Heydər Əliyev Fondu və Mədəniyyət Nazirliyinin təşkilatçılığı ilə keçirilən Üzeyir Hacıbəyli XVII Beynəlxalq Musiqi Festivalı rəngarəng tədbirlərlə davam edir.

Festival çərçivəsində sentyabrın 24-də Rəşid Behbudov adına Dövlət Mahnı Teatrının qarşısında açıq havada Üzeyir Hacıbəylinin anadan olmasının 140 illiyinə həsr edilən musiqili-teatral kompozisiya nümayiş etdirilib.

Kompozisiya Mahnı Teatrı solistlərinin ifasında Üzeyir Hacıbəylinin əsərlərindən parçalarla başlanıb. Aktyorlar isə unudulmaz musiqi korifeyləri – Üzeyir Hacıbəyli (Tərlan İsmayılzadə), Asəf Zeynallı (Adil Qaçayev), Fikrət Əmirov (Əməkdar artist İqrar Salamov), Qara Qarayev (Hüseynağa Aslanov) və maestro Niyazinin (Orxan Abışov) obrazlarını canlandırıblar. Bundan əlavə, Xalq artisti Gülyaz Məmmədova Telli, Ayşən Mehdiyeva Sənəm, Fəxri Kazım-Nicat Arşınmalçı, İdris Hüseynov Mirzə Ələkbər Sabir, Toğrul Məmmədov isə Mirzə Cəlil obrazında çıxış edib.

Bakı Xoreoqrafiya Akademiyasının tələbələri Fərid Mürsəlov, İlahə Əlizadə və Samirə Ələkbərova da kompozisiyada yer alıblar.

Sonra tədbir Dövlət Mahnı Teatrı estrada-simfonik orkestrinin (dirijor: Ellada Məmmədova) müşayiəti ilə davam edib.

Sonda bütün obrazlar meydanda bir araya gələrək tamaşaçıların alqışları altında xatirə fotosu çəkdiriblər.

Quruluşçu rejissoru Təhminə Hümbətova olan kompozisiya tamaşaçıları milli musiqimizin müxtəlif dövrlərinə səyahətə aparıb. Keçmişlə bu gün musiqinin dili ilə birləşib, milli irsimiz açıq səma altında yenidən canlanıb.