Şarlotta Bronte 1816-cı il aprelin 21-də Qərbi Yorkşirdə doğulub. Üç Bronte bacılarının ən böyüyüdür.Bronte bacıları - Şarlotta Bronte, Anna Bronte, Emili Bronte XIX əsr ingilis ədəbiyyatında öz əsərləri ilə iz qoymuş yazıçılardır.

Şarlotta pansionatda təhsil alıb. Məktəb haqqında Şarlottanın yaddaşında qalan acı xatirələr onun "Ceyn Eyr" əsərində özünü göstərir.

Pansionatı bitirdikdən sonra orada o, müəllimə kimi işləməyə başlayır. Sonrakı illərdə o, müxtəlif ailələrin yanında tərbiyəçi olaraq fəaliyyət göstərib və 1841-ci ilə qədər bu işlə məşğul olmağa davam edib.

1837-ci ildə o öz şeirlərini dövrün məşhur şairi Robert Santa göndərir. Ancaq cavab olaraq Robert Sant yazır ki, ömrünü tam olaraq şeirə həsr etmək qadın işi deyil. 

1846-cı ildə 3 bacı öz şeirlərindən ibarət toplu nəşr etdirir. Kitabın adını "Bell" qoyurlar. Amma onlar kişi təxəllüsündən istifadə edirlər.  Şarlotta - Karres, Emili - Ellis, Anna - Ekton. 1847-ci ildə eyni təxəllüslərlə öz əsərlərini Londona göndərirlər. Emilinin "Tufanlı aşırım", Annanın "Aqnes Qrey" əsəri qəbul olunur. Şarlottanın "Professor" əsəri isə rədd edilir.

"Şerli", "Vilett", "Professor" (vəfatı sonrası, 1857-ci ildə nəşr olunub) kimi əsərlər qələmə almış yazıçı, daha çox, 1847-ci ildə ilk nəşr olunan "Ceyn Eyr" əsəri ilə böyük nailiyyət qazanıb və Londonda təşkil edilən müxtəlif ədəbi məclislərə dəvət alıb.

Məşhur ingilis yazıçı Elizabet Qaskell ilə tanışlığı da məhz, bu dəvətlər vasitəsilə olub. Hətta, Elizabet Qaskell daha sonra, 1857-ci ildə nəşr olunmuş "Şarlotta Bronte Bioqrafiyası" adlı kitab da qələmə alıb.

Bacılarının ölümü səbəbi ilə tək qalmış Şarlotta, daha sonra atasının köməkçisi Artur Bell ilə ailə həyatı qurur, lakin evliliyindən bir il sonra 31 mart 1855-ci ildə 38 yaşında vəfat edir. Bu zaman o, yazmağı planladığı "Emma" adlı romanı üzərində çalışıb.

Bu gün də Şarlotta Bronte heç bir gücün boyunduruğu altına girmədən və səhv yola yönəlmədən, öz ayaqları üzərində duran ideal qadın xarakterini yaratdığı "Ceyn Eyr" əsəri ilə, öz gücünün fərqində olan hər bir qadının qəlbində yaşamağa davam edir.