Mehdi Əli oğlu Hüseynov (Mehdi Hüseyn) 1909-cu ildə Qazax rayonunun II Şıxlı kəndində anadan olub. 1929-cu ildə Azərbaycan Dövlət Universitetinin tarix fakültəsini bitirib. 1938-ci ildə Moskvada Dövlət Kinematoqrafiya İnstitutunun nəzdində akademiya tipli kinossenaristlər kursunda təhsil alıb.

Mehdi Hüseyn əlli altı illik ömrünün qırx ilini XX əsr Azərbaycan ədəbiyyatının təşəkkülü və inkişafına həsr edib. O, müxtəlif illərdə Azərbaycan Yazıçılar İttifaqının birinci katibi, Sovet Yazıçılar İttifaqının katibi kimi məsul vəzifələrdə çalışıb. Xalq yazıçısı Mehdi Hüseyn keçmiş SSRİ və Azərbaycan Ali Sovetlərinə deputat seçilib. Böyük yazıçı, dövlət adamı, ictimai-siyasi xadim olan Mehdi Hüseyn xalqımızın çoxəsrlik ədəbiyyatını və zəngin mədəniyyətini dünyanın bir sıra ölkələrində layiqincə təmsil edib.

Mehdi Hüseyn yaradıcılığa müxbir yazıları ilə başlayıb. Bir-birinin ardınca müxtəlif mövzularda bir sıra məqalələr yazan, çox keçmədən klassik irsə münasibət, yeni insan təsviri, yeni mövzular aləmi ilə bağlı geniş mübarizələrdə çıxış edib. Bu məqalələrdə uğurlar qazanmaqla yanaşı, müəllif tərəfindən yanlış mühakimələr də irəli sürülüb. Mehdi Hüseyni fərdi xüsusiyyətlərə malik nasir kimi tanıdan ilk əsəri “Tərlan” romanı olub.

Mehdi Hüseyn otuzuncu illərdən başlayaraq bir nasir kimi bədii əsərlərlə çıxış edib. O, ilk olaraq 1930-cu ildə “Xavər” və “Bahar suları” adlı hekayələrini oxuculara təqdim edib. Mehdi Hüseyn 1931-1937-ci illərdə daha iri həcmli əsərlər yazmağa başlayıb, bu sıradan üç hissədən ibarət olan və Azərbaycanda baş verən vətəndaş müharibəsinə həsr edilib, “Daşqın” romanını çap etdirib, kollektivləşmə dövründən bəhs edən “Tərlan” romanını yazıb.

İndi isə sizə Mehdi Hüseynin söylədiyi hikmətli kəlamları təqdim edirik

1. “Müasirlik bizim idealımızdır, ədəbiyyatımızın şah damarıdır”.

2. “İnsan olmayan yerdə bədii əsər də yoxdur”.

3. “Xalq fantaziyasının zənginləşdirib tamamladığı nağıl və dastanlar öz qüvvətini xalqın məğlubedilməz mənəvi qüvvətindən, mərdlik və igidliyindən alır”.

4. “Yazıçı hər şeydən əvvəl öz xalqının oğludur”.

5. “O ədəbiyyat böyükdür ki, ruhən əzəmətlidir, böyük iddialar və bəşəri hisslərlə yaşayır”.

6. “Nə zaman həqiqi şeir yaranır? O zaman ki, şair hər şeydən yox, yalnız onu coşduran, düşündürən, sevindirən və qəzəbləndirən şeylərdən yazır”.

7. “Sənət həqiqətdən qida alır. Əgər mən bir insanın inkişafını göstərərkən, onun psixoloji təsvirində yalnış xətlər çəkirəmsə, deməli, mən qarşımda dayanmış insanı düz görməmişəm”.

8. “Tarixçi psixoloq deyildir. Lakin sənətkar psixoloq olmalıdır. Bunsuz tarix elmi yaransa da, tarixi bədii əsər yarana bilməz”.

9. “Əgər şair və ədib bu günün fəlsəfəsi ideyaları ilə yaşamırsa, əgər onu müasir insanları maraqlandıran məsələlər maraqlandırmırsa, aydın məsələdir ki, onun yaratdığı əsərlərin təsir gücü heç vaxt istənilən səviyyəyə çatmayacaqdır”.