XX əsrin ən görkəmli pianoçularından biri, SSRİ-də və ABŞ-da böyük sənətkar kimi məşhur olan Aleksey Sultanov 7 avqust 1969-cu ildə musiqiçilər (atası Fazulhaqq Abdulhaqq oğlu violonçelist, anası Natalya Poqorelova skripkaçıdır) ailəsində dünyaya gəlib, nənəsi Zamirə xanım Hidoyatova, özbək xalqının tanınmış və sevimli aktrisasıdır.

Aleksey Sultanov 6 yaşından Özbəkstanda V.Uspenski adına respublika musiqi məktəbində Əməkdar müəllim Тamara Popoviçin sinfində (fortepiano) təhsil alıb. 8 yaşından konsertlər vermiş, 12 yaşında Beynəlxalq “Konsertino Praqa-82” müsabiqəsinin laureatı, 15 yaşında Özbəkistan Respublikası Komsomol mükafatı laureatı adına layiq görülüb. Təhsilini Моskva konservatoryasında (ali musiqi məktəbi) Lev İvanoviç Naumovun sinifində davam edib. 1986-cı ildə 17 yaşlı gənc pianoçu haqqında rejissor Əli Hamrayev sənədli film çəkib. 1989-cu ildə Van Klibern adina 8-ci Beynəlxalq pianoçular müsabiqəsinin qalibi çıxdıqdan sonra, davamlı olaraq qastrollara dəvət edilib.

1990-cı ildə konservatoryanın üçüncü kursunu davam etdirməyib və 1991-ci ildə Amerika Birləşmiş Ştatlarına gedib.

Sonralar, Aleksey Sultanov iki dəfə - 1995-ci ildə Varşavada F.Şopen adına 13-cü Beynəlxalq pianoçular və 1998-ci ildə P.Çaykovski adına Beynəlxalq pianoçular müsabiqələrində iştirak edib və hər iki müsabiqədə gənc pianoçuya qarşı ədalətsizlik olub. F.Şopen adına Beynəlxalq Pianoçular Müsabiqəsində, münsiflər heyəti ikinci dərəcəli mükafatı Aleksey Sultanova verməyi, birinci mükafatı isə heç kimə verməməyi qərara alıb. Aleksey Sultanov, ikinci dərəcəli diplomu qəbul edib və bu hadisədən sonra 26 yaşlı sənətkar iflic olub.

1998-ci ildə P.Çaykovski adına Beynəlxalq pianoçular müsabiqəsində münsiflər heyəti Prokofyevin “Yeddinci sonatası”nın ifasında gərəksiz sərbəstliyə yol verdiyi üçün, ona, müsabiqənin üçüncü turunda iştirak etməyə icazə verməyib. Bu hadisə haqqında dövri mətbuatda haqlı və kəskin etirazlar “Autsayderə eşq olsun!”, “Dahi isdedadlar laureat olmadan da dahidir” başlıqlı məqalələr dərc olunub.

Aleksey Sultanov, 1999-cu ilin noyabr ayında, Daşkənd şəhərində, Milli Simfonik orkestr ilə birlikdə, nənəsi, Xalq artisti Zamirə xanımın xatirəsinə solo konsert həsr edib. Aleksey Sultanov, qeyri-adi çıxışları ilə Avropanı, Asiyanı, Amerikanı fəth edib, dünyanın onlarla şəhərlərində konsertlər verib, “Filadelfi”, “Konsertgebau”, Britaniya simfonik orkestrləri ilə birlikdə çıxış edib, Helsinki, Berlin, Frankfurt, Hamburq, Sürix, Afina, Milan, Osako, Seul, Nyu-York və digər şəhərlərdə solo konsertləri verib, “La Skala”, “Karnegi-Holl”, “La Roke” konsert salonlarında alqışlanıb.

Məşhur pianoçu Vladimir Qorovis qayınatası – Arturo Toskaninidən qalmış dirijor çubuğunu gənc istedad Alekseyə hədiyyə edib.

2001-ci ildə Özbəkstanda yeni qastrol səfərlərinə hazırlıq görən gənc pianoçu, fevral ayında ikinci dəfə iflic olub. Bu ağır xəstəliyə baxmayaraq, Aleksey Sultanov xeyriyyəçilik konsertləri verməyi davam etdirib.

Temperamentinə görə Aleksey Sultanovun repertuarı romatizm və postromantizmdir.Yaradıcılığına Şopen, List, Raxmaninov, Skraybin kimi ölməz sənətkarlarin əsərləri daxildir. Aleksey Sultanov sənətində fövqəladə ifadə tərzi, sözün əsl anlamında, ən səmimi lirik xəyallar yer tutmaqdadır.

Son illərini ABŞ-da yaşayan, “hər bir bəstəkarın qəlbinə yol açmağı bacaran”, “pianoçuların vulkanlar sinifinə aid olan”, “sərbəst, coşqun”, “Fortepiano aslanı” musiqi ustası, dörd il davam edən mərdanə mübarizədən sonra 30 iyun 2005-ci ildə əbədiyyətə qovuşub.