Teodor Drayzer 1871-ci il avqustun 27-də İndiana ştatının Terre-Hote şəhərində alman emiqrantı Con Drayzerin (İohan Paul Drayzer) ailəsində anadan olub. 

1889-ci ildə İndiana universitetinə qəbul olur lakin ehtiyac ucbatından təhsilini yarımçıq qoyub.

1892-1895-ci illərdə Çikaqo, Sent-Luia, Pitsburq və Nyu-York şəhər qəzetlərində işləyib. 

1900-cu ildə ilk irihəcmli əsəri olan "Kerri bacı" romanını yazıb. 1250 nüsxədə çap edilən kitabın yalnız 450 nüsxəsi yayılıb. Tənqidçilər Drazyzeri qəddarlıqda, əxlaqsızlıqda, gəncləri pis yola sürükləməkdə, “çəhrayı Amerika” romançılığına zərbə vurmaqda təqsirləndirirlər. Bu əsərinə görə 68 dollar 40 sent qonorar alan otuz yaşlı yazıçı yaradıcılığına tam 10 il ara verməyə məcbur olub.

1907-ci ildə İngiltərədə yenidən işıq üzü görən "Kerri bacı" romanı bestsellerə çevrilir və bu dəfə tənqidçilərin yüksək rəyini alır. Bütün Avropa dillərinə çap olunan roman yalnız bundan sonra yazıçının vətənində də şöhrət tapmağa başlayıb və Hazırda XX əsr Amerika ədəbiyyatının "vizit kartı" adlandırılıb.

1915-ci ildən sonra Drayzer ictimai qaydaların adi insanlara göstərdiyi əzici təsiri əks etdirən hekayə və esselər yazmağa başlayıb. Bu ideya bir məhkəmə prosesinin protokoluna əsaslanan və ədibin ən məşhur əsəri olan "Amerika faciəsi"nin mövzusunu təşkil edib.

"Kerri bacı" romanından sonra Teodor Drayzer "Cenni Herhardt" (1911), "Arzular trilogiyası": "Maliyyəçi" (1912), "Titan" (1914), "Dözümlülük" (tamamlanmayıb 1947), "Dahi" (1915), "Amerika faciəsi" (1925), "Dayaq" (1946) romanlarını və bir sıra publisistik əsərlərini yazıb.

1927-ci ildə Drayzer oktyabr inqilabının 10 illik yubileyi münasibəti ilə bağlı SSRİ-yə səfər edib. Bu səfər zamanı bir çox şəhərləri gəzən ədib Bakıda da olub. Səfər təəssüratlarını “Drayzer Rusiyaya baxır” publisistik əsərində qələmə alıb.

1945-ci ilin iyulunda Amerika Kommunist partiyasına üzv olan Teodor Drayzer elə həmin il dekabrın 28-də 75 yaşında Los-Anceles ətrafındakı Hollivud rayonunda (Kaliforniya ştatı) dünyasını dəyişib və yerli məzarlıqda dəfn edilib.