Sentyabrın 2-də 77-ci Venesiya Film Festivalının açılış mərasimi keçirilib.

AZƏRTAC TASS agentliyinə istinadla xəbər verir ki, təntənəli açılış mərasimi Ennio Marikonenin “Bir dəfə Amerikada” (С'era una volta in America, 1984) filminə bəstələdiyi musiqinin səsləndirilməsilə başlayıb. Açılış zamanı Domeniko Starnonenin romanı əsasında italiyalı rejissor Daniel Lukettinin 2017-ci ildə çəkdiyi “Ailə bağları” (Lacci) filmi nümayiş olunub. Burada məşhur italyan aktyorların ifasında xoşbəxt olmayan bir ailənin həyatı və qəhrəmanların başına gələn hadisələrin bir-biri ilə əlaqəsi xüsusi detallarla təsvir olunub.

Mərasimdə britaniyalı aktrisa Tilda Suinton kinematoqrafiya sahəsinə verdiyi töhfələrə görə “Müqəddəs Markın şiri” mükafatına layiq görülüb. Ənənəvi olaraq, İtaliyanın Lido adasında keçirilən və bir neçə gün davam edəcək tədbirdə ispaniyalı rejissor Pedro Almodovarın ekranlaşdırdığı və baş rolda Tilda Suintonun canlandırdığı “İnsan səsi” (The Human Voice) filmi təqdim ediləcək.

Budəfəki festivalın açılış mərasimi İtaliya kinoteatrlarında, müxtəlif platformalarda striminq vasitəsilə və sarayın açıq havada qurulmuş zalında yayımlanıb. Koronavirusun yayılmasının qarşısını almaq məqsədilə qala mərasiminin keçirilməsi ləğv edilib.