Ənvər Əliverdi oğlu Əlibəyov (Ənvər Əlibəyli) 1916-cı il aprel ayının 1-də Bakıda anadan olub. Əvvəl Tibb Texnikumunda (indiki Tibb Kolleci), sonra Azərbaycan Dillər Universitetinin fəhlə fakültəsində, daha sonra APİ-nin (indiki ADPU) ədəbiyyat fakültəsində təhsil alıb.

1936-cı ildə kiçikyaşlı uşaqlar üçün şeirlər yazıb, dövri mətbuatda çap etdirib.

1938-ci ildən İkinci Dünya müharibəsi başlayana qədər Azərbaycan radiosunda çalışıb. Tiflisdə Topçular Hərbi məktəbini bitirib, zabit rütbəsi ilə könüllü olaraq ön cəbhəyə gedib. İkinci Dünya müharibəsinin ilk günlərindən ordu sıralarında olan Ə.Əlibəyli artilleriya komandiri olub, məşhur 416-cı Taqanroq atıcı diviziyasında ağır döyüş yolu keçib, Qafqaz və Ukraynanın azad olunmasında fəal iştirak edib. 1944-cü ildə ağır yaralandıqdan sonra yazıçı-jurnalist kimi döyüşdə iştirakını davam edib.

XX əsrin 40-cı illərinin sonlarında “İnqilab və mədəniyyət”, “Təbliğatçı” jurnallarının məsul katibi olub, 1948-1952-ci illərdə Azərbaycan Yazıçılar İttifaqının orqanı olan “Ədəbiyyat qəzeti”nin redaktoru, 1952-ci ildən ömrünün sonunadək Dövlət Radio və Televiziya Verilişləri Komitəsinin sədri vəzifələrində çalışıb.

1939-cu ildən Sovet Yazıçılar İttifaqının üzvü olan Ənvər Əlibəylinin şeir və poemaları rus və keçmiş SSRİ xalqlarının dillərinə tərcümə edilib.

Onun “Qaranquş” adlı ilk şeirlər kitabı 1947-ci ildə işıq üzü görüb. Sonrakı illərdə “Sənin adınla”, “İlk məhəbbət”, “Dostluq körpüsü”, “Mingəçevir şeirləri”, “Dalğalar arasında”, “Elə xoşbəxtəm ki!”, “Ədəbiyyat”, “Nəğmələr”, “Bir kitab şeir”, “Ürəyimdəsən”, “Seçilmiş əsərləri” və s. kitabları nəşr olunub.

Ə.Əlibəyli həm də bir neçə poemanın müəllifidir. Samur çayının suyunu quraq torpaqlara çatdıran inşaatçıların bəhrəli əməyindən bəhs edən “Samur dastanı” poeması, 1941-1945-ci illərin hadisələrindən bəhs edən “Bacı”, “Gözlər, ürəklər, əməllər” poemaları, dəniz neftçilərinin şücaətini tərənnüm edən “Dalğalar arasında”, “Polad”, “Dostluq körpüsü” və başqa poemalar buna nümunə ola bilər. S.Rüstəmov, C.Cahangirov, R.Hacıyev, T.Quliyev, A.Rzayeva, Q.Hüseynli, Z.Bağırov, R.Mustafayev, İ.Topçubaşov, V.Adıgözəlov kimi dəyərli bəstəkarlar şairin şeirlərinə “Azərbaycan”, “Gəlmədin”, “İlk məhəbbət”, “Lirik mahnı”, “Gəl-gəl”, “Xəzərim”, “Qəşəng qızlar”, “Narınc” və başqa mahnılar yazıblar.

Ə.Əlibəyli “Vətən müharibəsi” (II dərəcəli), “Qırmızı ulduz” ordenləri, “Qafqazın müdafiəsinə görə”, “Almaniya üzərində qələbəyə görə” medalları ilə təltif olunub.

Ənvər Əlibəyli 1968-ci il may ayının 7-də Bakıda vəfat edib, Fəxri Xiyabanda dəfn olunub.