SSRİ Xalq artisti Ələsgər Ələkbərovun adı çəkiləndə gözümün önündə ilk növbədə aktyorun “Uzaq sahillərdə” filmində yaratdığı partizanlara övlad qayğısı ilə yanaşan həssas, eyni zamanda düşmənə qarşı mübariz və kəskin komandir obrazı və Mirzə İbrahimovun eyniadlı əsəri əsasında çəkilmiş “Böyük dayaq” filminin qəhrəmanı, prinsipial, ağayana, sözündən dönməyən, sərt olduğu qədər də rəhmli, təmkinli kolxoz sədri Rüstəm kişi obrazı canlanır. Lakin bu rollar ustad sənətkarın kinolentdən yaddaşımızda iz qoymuş sənət incilərinin cüzi bir hissəsidir. 

Ələsgər Ələkbərovun Səməd Vurğunun “Vaqif” əsərində ifa etdiyi Vaqif obrazı və onun Qacarla dialoqunda milli xüsusiyyətləri xalqın danışan dili olan şairin simasında əyilməz və dönməz, əqidəli və cəsarətli, geniş dünyagörüşlü bir obraz kimi təqdimatı, Şekspirin “Otello”sunda baş qəhrəmana çılğın, eyni zamanda emosional yanaşması aktyorun sağlığında ikən əfsanəyə çevrilməsinə və Azərbaycan çərçivəsindən kənarlarda da böyük rəğbətlə, sevilərək qarşılanmasına səbəb olub. Təsadüfi deyil ki, Ələsgər Ələkbərovun Otellosu Böyük Britaniyanın “Şekspir” Muzeyində bu obrazın ən gözəl ifaçıları ilə bir sırada sərgilənir. Moskva dekadasında həmin tamaşanı seyr edən və heyran qalan ingilislər tamaşanı lentə alıb, aparıblar. Tamaşa vaxtı Moskva teatrının pərdəsi alqışlardan düz 17 dəfə bağlanıb və yenidən açılıb.

Teatr, kino mədəniyyətimizin inkişafında əvəzsiz xidmətləri olan Ə.Ələkbərov klassik aktyor sənəti məktəbinin gözəl ənənələrinin yaşadığı hər aktyora müyəssər olmayan mühitdə püxtələşib. Azərbaycan teatrının ulduzları sırasında özünəməxsus yeri və çəkisi olan aktyor, sənəti və ciddiliyi ilə rəqabətə davam gətirərək örnəyə çevrilib. 

Ələsgər Ələkbərov 26 mart 1910-cu ildə Bakıda anadan olub. Məktəbdə oxuduğu illərdə Əbilov klubundakı dram dərnəyində, daha sonra Bakı Teatr Texnikumunda təhsil alıb. Bir müddət Bakı Türk İşçi Teatrında çalışıb, burada Hacı Baxşəli (“Ölülər”), ikinci bələdiyyə (“Hücum”) kimi yaddaqalan obrazlar yaradıb. 

Teatrda işlədiyi illərdə aktrisa Hökümə Qurbanova ilə ailə həyatı qurub. Bu evlilikdən onların Nailə adlı qız övladları dünyaya gəlib. 1933-cü ildə Bakı Türk İşçi Teatrı Gəncəyə köçürülərkən gənc ailə də Bakıdan Gəncəyə köçüb. Amma çox keçməmiş onların ailəsi qısqanclıq üstündə dağılıb.

Aktyor ikinci dəfə ailə həyatı qurub, bir neçə il Tiflis Azərbaycan Teatrında, Gəncə Teatrında çalışıb, 1933-cü ildən Akademik Dram Teatrında işləməyə başlayıb. Teatrda Maktuf (“Maqbet”), şah Zeyir (“Şahnamə”), Aydın (“Aydın”), Heydərbəy (“1905-ci ildə”), Fərhad (“Fərhad və Şirin”) və s. rolları ifa edib.

Ə. Ələkbərov həm də bir sıra filmlərdə rol alıb. “Dovjenko” adına Kiyev kinostudiyasında çəkilən “Varislər” filmində don Aqilla rolunu uğurla oynayıb. Azərbaycan kinosunda Rüstəm kişi (Böyük dayaq”), Fətəli xan (“Fətəli xan”) kimi yaddaqalan rolları da oynayıb. Onun yaratdığı Rüstəm kişi (“Böyük dayaq”) kinomuzun əvəzsiz obrazlarındandır. O, “Lətif”, “Almaz”, “Kəndlilər”, “Leyli və Məcnun” və “Uzaq sahillərdə” filmlərində də unudulmaz obrazlar yaradıb. 

O, 1961-ci ildə “SSRİ Xalq artisti”fəxri adına layiq görülüb.

Unudulmaz aktyor 31 yanvar 1963-cü ildə vəfat edib.