Mayın 2-də Bakı Şəhər Mədəniyyət Baş İdarəsinin Cəfər Cabbarlı ev-muzeyi və Yasamal rayonu Heydər Əliyev Mərkəzinin birgə təşkilatçılığı ilə Ümummilli lider Heydər Əliyevin 100 illik yubileyinə həsr olunmuş “Böyük Lider Heydər Əliyev və mədəniyyətimiz” adlı tədbir keçirilib. Tədbir ölkə başçısı, cənab İlham Əliyevin 29 sentyabr 2022-ci il tarixli Sərəncamına müvafiq olararaq “Heydər Əliyev ili” çərçivəsində baş tutub.

Qonaqlar ilk öncə Heydər Əliyevin abidəsi önünə gül dəstəsi düzüblər.

Tədbir Azərbaycan Respublikasının Dövlət Himninin  səsləndirilməsi ilə başlanıb. Sonra Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.

Əvvəlcə Mərkəzin böyük elmi işçisi Ümummilli liderin 100 illik yubileyinə həsr olunmuş “Heydər Əliyev və Azərbaycan Mədəniyyəti” adlı təqdimat və mühazirə ilə çıxış edib.

Çıxışçılar Ulu Öndər Heydər Əliyevin Azərbaycan ədəbiyyatı və mədəniyyətinin inkişafındakı misilsiz xidmətlərindən, onun dövlətimizin bütün sahələrinə olan diqqət və qayğısından, respublikamızda muzey işinin təkmilləşdirilməsi və yeni muzey sisteminin qurulması, xatirə və ev-muzeyləri şəbəkəsinin yaradılması, gənc nəslin maarifləndirilməsi və təlim-tərbiyəsinin inkişafı üçün gördüyü dəyərli işləri haqqında maraqlı məlumatlar veriblər. Həmçinin Heydər Əliyevin Azərbaycan dili və ədəbiyyatı ilə bağlı gördüyü dəyərli işlərdən, təhsil və maarifçilik sistemində həyata keçirdiyi uğurlu islahatlarından bəhs olunub.

Tədbirdə 3 nömrəli Uşaq-Gənclər İnkişaf Mərkəzinin “Gənc aktyorlar” dərnəyinin üzvləri Heydər Əliyevə həsr olunmuş şeirlərlə çıxış ediblər.

Sonda “Ulu öndər Heydər Əliyevin Azərbaycan Mədəniyyətinin inkişafında rolu” adlı film nümayiş olunub.