Rus sovet yazıçısı, rus ədəbiyyatının klassiki Konstantin Georgiyeviç Paustovski 19 (31) may 1892-ci ildə Moskvada anadan olub. 1898-ci ildə ailəsi ilə Ukraynaya köçüb, 1904-cü ildə Kiyevdə gimnaziyaya daxil olub. 1912-ci ildə oranı btirdikdən sonra Kiyev Universitetinin tarix-filologiya fakültəsinə qəbul olunub. I Dünya Müharibəsi başladığı zaman Moskvaya qayıdıb, müxtəlif işlərdə çalışıb. 1930-cu illərdən “Pravda” qəzetində, “30 gün” və digər jurnallarda jurnalist kimi fəaliyyət göstərib, çoxlu səyahət edib.

1928-ci ildə ilk hekayələr toplusu olan “Qarşı gəmilər” çapdan çıxıb. 1931-ci ildə “Kara-Buqaz” povesti ilə ədəbi yaradıcılıq fəaliyyətini seçib və peşəkar yazıçı olub.

1932-ci ildə ölkənin şimalına səfər edib və bu səfərin təəssüratları “Şarl Lonsevilin taleyi”, “Göl cəbhəsi” povestləri və oçerklərdə öz əksini tapıb. II Dünya Müharibəsi zamanı bir müddət hərbi müxbirlik edib, sonra yeni pyesi üzərində işləməsi üçün ailəsi ilə birgə Alma-Ataya göndərilib. Burada o, “Nə qədər ki, ürək vurur” pyesini, “Vətənin tüstüsü” romanını, bəzi hekayələrini qələmə alıb. 1950-ci illərin ortalarında Paustovski dünya tərəfindən tanınıb. Avropaya səyahət imkanı qazanan yazıçı bir çox ölkələrdə olub, bir müddət Kapri adasında yaşayıb. 1965-ci ildə Nobel mükafatına mümkün namizədlər sırasında olub, amma mükafat M.Şoloxova verilib.

Görkəmli yazıçı Konstantin Georgiyeviç Paustovski 1968-ci il iyulun 14-də Moskvada vəfat edib.