Sentyabrın 19-da Bakı Şəhər Mədəniyyət Baş İdarəsinin İbrahim Əbilov adına Mədəniyyət Mərkəzində Avropa İttifaqının Azərbaycandakı nümayəndəliyi Avropa Birliyinə üzv dövlətlərin səfirlikləri və yerli tərəfdaşları ilə birlikdə təşkil edilən “Qız qalası. Qadın olmaq” Müasir İncəsənət Festivalı çərçivəsində "Qadın olmaq" mövzusunda Azərbaycan sənətkarlarının Video İncəsənəy sərgisinin açılışı olub.

“Qız Qalası. Qadın olmaq” Müasir İncəsənət Festivalının builki mövzusu Azərbaycanda qadın azadlığının100 illiyinə həsr olunub. Festival ölkəmizdə, eləcə də bütün dünyada qadınların rolunun gücləndirilməsi məsələlərini özündə əks etdirirdi. 2009-cu ildə ilk dəfə "Qız Qalası. Qadın olmaq" adlı beynəlxalq müasir incəsənət forumunun təşəbbüskarı olan Azərbaycan Respublikasının Əməkdar rəssamı Səbinə Şıxlinskaya festivalı giriş sözü ilə açıq elan edərək gender bərabərliyi mövzusundan bəhs edib.

Daha sonra Avropa Birliyinin Bakıdakı nümayəndəliyinin rəhbəri Kestutis Jaunkauskas, muavini Denis Daniliidis və Bakı Şəhər Mədəniyyət Baş İdarəsinin rəis muavini Nazim Əliyev də festivalla bağlı fikirlərini qeyd ediblər. Festivalın bu günü video incəsənəti əsərlərinin nümayişi və sərgi ilə başa çatıb.