Yaşar Nuri 1951-ci il sentyabr ayının 3-də Bakıda tanınmış aktyor Məmmədsadıq Nuriyevin ailəsində dünyaya gəlib. Səhnəyə ilk dəfə on bir yaşında Azərbaycan Dövlət Musiqili Komediya Teatrında "Toy kimindir?" (dramaturq Məhərrəm Əlizadə) tamaşasında Tapdıq rolunda çıxıb. Məktəbli vaxtlarında dövlət televiziyasının "Yelkən" verilişinin aparıcılarından olub. Bundan başqa o, "Buratino", "Qaranquş", "Pioner" uşaq verilişi-teatrlarında müntəzəm iştirak edib. Müxtəlif dram dərnəklərinə gedib, 26-lar adına məddəniyyət sarayı xalq teatrının tamaşalarında çıxış edib.

1968-ci ildə Bakıdakı 173 nömrəli orta məktəbi bitirib Azərbaycan Dövlət İncəsənət İnstitutunun dram və kino aktyorluğu fakültəsinə daxil olur. Orada kurs rəhbərləri, tanınmış səhnə xadimləri Rza Təhmasib və Əliheydər Ələkbərovdan aktyorluq sənətinin incəliklərini öyrənib.

İnstitutda, fakültədə, kursda Yaşar qeyri-formal lider idi. Tələbəlik çağlarında hamı ondan çox şey gözləyib, hamı onu "hazır aktyor" sayıb. Yaşarın istedadı yaşından yaşlı idi. İnstitut dövründə "Sevil"də Balaş, "Toy"da Salmanov, "Günahsız Müqəssirlər"də Neznamov və s. obrazları yaradıb.

1972-ci ildə institutu bitirdikdən sonra 1 il orduda xidmət edib və institutun tədris teatrında aktyor işləyib. 1974-cü il dekabr ayının 1-də Akademik Milli Dram Teatrının baş rejissoru Tofiq Kazımovun dəvətilə bu kollektivin aktyor truppasına qəbul olunub.

Teatr aktyoru kimi görkəmli sənətkar olan Yaşar Nuri həm də məşhur kino ustasıdır. Onun böyük populyarlıq qazandığı çoxlu ekran obrazları var. Əlliyə yaxın bədii filmə çəkilib, Azərbaycan Dövlət Televiziyasında hazırlanmış yüzdən çox tamaşada, bədii kompozisiyada, satirik səhnəciklərdə iştirak edib. Onun əsasən baş rolları ifa etdiyi teletamaşalar televiziyanın fondunda daimi sənət nümunələri kimi qorunur. Xalq artisti Yaşar Nurinin televiziyada Ruhəngiz Qasımovanın “Qonşu, qonşu olsa…” tamaşasında yaratdığı on bir müxtəlif tip, “Yollar görüşəndə” Yaşarı, İsi Məlikzadənin “Qatarda” tamaşasında Dadaşovu, Anarın “Evləri köndələn yar”ında Surxayzadəsı, “Nigarançılıq”da Qurbanəli bəyi, Hüseyn Cavidin “Topal Teymur”unda Cücə, Mövlud Süleymanlının “Kökdən düşmüş piano”sunda Qəhrəmanı, Üzeyir Hacıbəylinin əsərləri əsasında Rauf Hacıyevin “Ordan-burdan” tamaşasında Fotoqraf Əli bəyi, Mehdi Hüseynin “Alov” pyesində Bədəl, Ənvər Məmmədxanlının “Şərqin səhəri”ndə Nəcəf dayı, İslam Səfərlinin "Göz həkimi"ndə Həsənağa, Anatoli Dudarevin “Astana”sında Andrey Buslayı, Aslan Qəhrəmanovun “Bağışla”, ”Səni axtarıram”, “Səndən xəbərsiz” trilogiyasında Elçini, Əbdürrəhim bəy Haqverdiyevin əsərləri əsasında "Ac həriflər" və s. teletamaşalarda rolları özünəməxsus yüksək zövqlə, məharətli improvizələrlə ifasının təcəssümüdür.

Aktyor nəinki televiziya, həmçinin radio və kinostudiyanın dublyaj sektoru ilə də əməkdaşlıq edib, radioda "Sabahınız xeyir", "Gülüş axşamı" yumoristik verilişlərinin, radio tamaşalarının iştirakçısı olub. "Azərbaycanfilm" kinostudiyasında isə saysız hesabsız yerli filmləri səsləndirib, əcnəbi filmləri dublyaj edib.

Yaşar Nuri cəsarətli aktyor kimi qəliz rəqs nömrələrini, muğam və ya estrada, yaxud aşıq musiqisi üzərində qurulan satirik, dramatik, psixoloji, komik, qroteskli, karnaval estetikasına uyğun obrazların ifasında uğur qazana bilib. Səhnədə həmişə canlı, təravətli, dadlı-tamlı, ürəklərə yol tapan olub.

Akademik Milli Dram Teatrında fəaliyyətə başladığı ilk illərdən Yaşara bir qayda olaraq xarakter rollar tapşırılıb. Səhnədə ilk rolu A.Vampilovun "Övlad" (1974) komediyasında Silva rolu olub. Bundan başqa o İ.Əfəndiyevin "Bağlardan gələn səs" dramında Pərviz (1975), M.İbrahimovun Molyerin məşhur komediyası əsasında yazdığı "Bəşərin komediyası və yaxud Don Juan"da Sqanarel (1977), Ə.Əylislinin "Quşu uçan budaqlar" pyesində Qasım (1978), M.Məmmədovun təfsirindəki "Dəli yığıncağı" faciəsində Sərsəm Salman (1978), Fuad və Zəminə Hacıyevlərin hazırladığı "Sevil"də Əbdüləli bəy (1978) obrazlarını yaradıb.

Ömrünün sonlarında unudulmaz aktyor Üzeyir Hacıbəyli irsinə müraciət edərək həm aktyor, həm də rejissor kimi demək olar ki, eyni vaxtda üç müxtəlif teatrda misilsiz səhnə əsərləri yaradıb. Akademik Opera və Balet Teatrında “Arşın mal alan” operettasına həm quruluş verib, həm də Soltan bəy obrazını ifa edib. Musiqili Teatrın səhnəsində “O olmasın, bu olsun” tamaşasına quruluş verib və Azərbaycan Dövlət Kukla Teatrında “Məşədi İbad” tamaşası ilə səhnə ilə tamaşaçı arasında maraqlı eksperiment edərək, Məşədi İbad obrazı ilə izləyicilərin qarşısına çıxıb.

Kinorejissor Şamil Mahmudbəyovun ekranlaşdırdığı "Dörd Bazar Günü" filmində yaratdığı Seyran, "Əzablı Yollar" nağıl-filmində kiçik div, "Yol Əhvalatı" filmində Makintoş rolu tamaşaçılar tərəfindən o qədər sevilib ki, ekranda hər nümayişi böyük rəğbətlə qarşılanır. Aktyorun 1988-ci ildən üzübəri kinorejissor Vaqif Mustafayevlə birgə işlədiyi rollar xüsusilə diqqəti çəkir. "Musiqili Xaş" və "Bəyin oğurlanması" (Ceyhun Mirzəyevlə birlikdə), "Yaramaz"dakı Maşallahı, "Hər şey yaxşılığa doğru", "Nakəs", "Fransız", "Yoxlama" filmlərindəki bir-birindən maraqlı və yaddaqalan rolları bu maraqlı tandemin ekran həllidir.

"Lətifə"dəki Məmmədi, "Qətl günü"ndə Mahmud doktoru, "Nə gözəldir bu dünya..."dakı Asim Əliyeviçi tamaşaçıların sevimlisinə çevrilmiş obrazlardır.

Aktyorun yubileyləri də təntənəli və yaddaqalan olub. 1981-ci ildə 30 illik yubileyində o, “Əməkdar artist” fəxri adını, 1991-ci ildə 40 illik yubileyində "Yaramaz" filmindəki roluna görə Dövlət Mükafatı alıb. 1996-cı ildə 45 illiyinə həsr olunmuş "Səhnəmizin Yaşarı", 2001-ci ildə isə 50 illiyi ilə əlaqədar "Yaşar olduğu kimi" sənədli filmləri çəkilib. 2011-ci ildə Yaşar Nurinin 60 illik yubileyi Azərbaycan Dövlət Akademik Milli Dram Teatrında təntənəli şəkildə qeyd olunub.

Yaşar Nuri həmçinin Azərbaycan Lenin Komsomolu mükafatına, “Azərbaycan SSR Xalq artisti” fəxri adına, iki dəfə "Qızıl dərviş" mükafatına, Azərbaycan Respublikası Prezidentinin I dərəcəli mükafatına, Azərbaycan Respublikası Prezidentinin fərdi təqaüdünə, "Şöhrət" ordeninə və Milli Kino Mükafatına layiq görülüb.

Azərbaycanın Xalq artisti Yaşar Nuri 22 noyabr 2012-ci ildə uzun sürən ağır xəstəlikdən sonra dünyasını dəyişib.