Dahi fransız yazıçısı Aleksandr Düma 1802-ci ildə Fransanın Viller-Kotre şəhərində anadan olub. Dörd yaşında ikən atasını itirən Düma anasının çəkdiyi min bir əzab-əziyyət sayəsində böyüyür. Atasının Napoleonun şanlı müharibələrində nümayiş etdirdiyi qəhrəmanlıqlar haqqında eşitdikləri isə onda macəra və qəhrəmanlıq motivlərinə sonsuz maraq oyadır.

O, əmək fəaliyyətinə notariat kontorunda xidmətlə başlayıb, lakin bu iş onu qane etmədiyindən meylini teatra salıb. Ədəbiyyata da dramaturq kimi gəlib.

1829-cu ildə gənc Dümanın ilk əsəri olan "3-cü Henri və onun sarayı" adlı tarixi əsəri səhnələşdirilib. Bu, köhnə klassisizm ədəbi qanunlardan kənara çıxan romantik dram əsəri idi. Əsərdə antik süjetlər yerinə 16-cı əsr Fransa həyatının hadisələri və tarixi şəxsiyyətlər səhnəyə çıxıb. Bu əsər yazıçıya şöhrət gətirib.

1831-ci ildə nəşr olunan "Antoni" dramında Paris cəmiyyətinin yüksək təbəqəsi tənqid atəşinə tutulur. Yazıçının 30-cu illərdə yazdığı "Kin" (1836) və digər romantik dramları melodram janrındadır, əsərlər çox vaxt xoşbəxt sonluqla bitir. 

Dram əsərlərindən sonra Düma məşhur macəra romanları ilə böyük şöhrət qazanır. "Qraf Monte Kristo", "Üç muşketyor", "Dəmir maskalı adam", "Qara zanbaq" kimi əsərləri böyük oxucu kütləsi toplayır. 

Düma çoxlu səfərlər edib, o cümlədən Qafqaza, Azərbaycana da gəlib. Yazçı Şuşada Xurşidbanu Natəvanla görüşüb. Natəvanın dərin biliyi, şairlik və rəssamlıq qabiliyyəti onu heyran edir.

Səfərdən qayıtdıqdan sonra yazıçı qələmə aldığı "Qafqaza səfər" əsərində Natəvanla görüşü xoş xatirələrlə təsvir edib. İndi isə Aleksandr Dümanın işlətdiyi məşhur aforizmləri təqdim edirik:

Nə qədər ağıllı danışsan da, uzunçuluq eləyən kimi dediklərin axmaq sözlərlə bitəcək.

İnsan həyatı davam eləməyin bir, həyatı məhv eləməyin isə minlərlə yolunu bilir.

Uğurun iki səbəbi var: Səbr və ümid.

Heç bir işin olmayanda gözləmək xüsusilə dözülməz olur.

Sevgi bizi böyük işlərə ruhlandırır və həm də bu işləri görməyə mane olur.

Cavanlıq artıq cavan olmayan üçün böyük çatışmazlıqdır.

Analıq qadının gözəlliyini tamamlayır.

Hörmət hissindən məhrum olan məhəbbət, çox davam edə bilməz.