Asif Yusif oğlu Məhərrəmov (Fred Asif) 1952-ci il iyulun 26-da Ağdam şəhərində anadan olub. On bir uşaqlı ailənin ilki idi. Uşaqlıqdan boks və futbolla məşğul olub. 1969-cu ildə Ağdam şəhər 1 nömrəli orta məktəbi bitirib və Ağdam Dəzgahqayırma zavodunda fəhlə kimi əmək fəaliyyətinə başlayıb.

O, 1991-ci ildən başlayaraq Ağdamın Abdal-Gülablı, Xıdırlı, Əmirallar, Sırxavənd, Bağbanlar, Əhmədavar kəndlərində düşmənə qarşı müdafiə dəstələri yaradıb. Hərbçi olmasa da döyüş meydanlarında göstərdiyi hünərə görə Azərbaycan Respublikası mudafiə nazirinin əmri ilə ona polkovnik-leytenant hərbi rütbəsi verilib və batalyon komandiri təyin olunub.

1992-ci il fevralın 25-dən 26-na keçən gecə Xocalı camaatını xilas etmək üçün Ağdam-Əsgəran istiqamətində dəhlizin açılmasında öz batalyonu ilə iştirak edib. Elə həmin ilin mart ayında Asif minaaxtaranlar hissəsinin komandiri təyin edilir. Onun köməyi ilə Aranzəmin, Pircamal, Dəhrəz kəndləri düşməndən təmizlənir.

1992-ci ilin martında Füzuli şəhərinin müdafiəsinə köməyə gedib, düşmənə ağır zərbə vurub.

24 iyun 1992-ci ildə döyüşlərdən birində ağır yaralanan Asif Məhərrəmov bir müddət müalicə aldıqdan sonra yenidən cəbhəyə qayıdır. Qəhrəman döyüşçü dəfələrlə yaralanmasına və sağlamlığını itirməsinə baxmayaraq, döyüş əzmini qoruyub saxlayır və əsgərlərə nümunə olur.

Lakin vəziyyəti ağırlaşdığından Bakıda xəstəxanaya gətirilir. Ağdamın işğal olunması xəbərini xəstəxanada alan Asif çox sarsılır və vəziyyəti daha da pisləşir.

Polkovnik-leytenant Asif Məhərrəmov 1994-cü il iyulun 1-də müharibədə aldığı yaraların nəticəsində dünyasını dəyişib. Bakı şəhərində II Fəxri Xiyabanda dəfn edilib.