Aydın Qaradağlı 20 avqust 1929-cu ildə Qubada anadan olub. 1944-cü ildə orta məktəbi, 1945-ci ildə Gəmiçilik məktəbini (Azərbaycan Dövlət Dəniz Akademiyasını) bitirib. Azərbaycan SSR dövlət radiosuna diktor vəzifəsinə işə qəbul olunub. M.F.Axundov adına Azərbaycan Dövlət Teatr məktəbini (aktyor ixtisası ilə), 1949-cu ildə Moskvada Ümumittifaq diktorluq kurslarını bitirib. Aydın Qaradağlı Sovet Ordusunda xidmət edib.

1955-ci ildə Gültəkin xanım Cabbarlı ilə ailə həyatı qurub. 1956-cı ildə Xanım, 1959-cu ildə Aygül adlı qızları, 1966-cı ildə isə Vüqar adlı oğlu anadan olub. 1961-1966-cı illərdə – M.A.Əliyev adına Azərbaycan Dövlət Teatr İnstitutunda oxuyub. 1964-cü ildə “Azərbaycan SSR Əməkdar artisti” (diktorlar arasında ilk dəfə) fəxri adına layiq görülüb. 1966-1968-ci illərdə Dövlət Radiosunun Baş rejissoru, 1970-ci ildə isə Proqram Baş redaksiyasının Baş redaktoru vəzifələrində çalışıb.

Azərbaycan radiosunun "Qızıl fond"unda Aydın Qaradağlının ifasında dünya klassiklərinin , o cümlədən, Nizami, Füzuli, Natəvan, Cəfər Cabbarlı, Məhəmmədhüseyn Şəhriyarın və digər klassiklərinin, habelə Səməd Vurğun, Süleyman Rüstəm, Rəsul Rza, Hüseyn Arifin əsərlərinin səsyazmaları qorunub saxlanılır.

Aydın Qaradağlı 1980-ci ilin 28 yanvar tarixində dünyasını dəyişib.

Allah rəhmət eləsin.