Noyabrın 2-də YARAT Müasir İncəsənət Mərəzində kinorejissor, yazıçı və kurator Aleksey Ulko mühazirə deyəcək.

AZƏRTAC xəbər verir ki, rus dilindən Azərbaycan dilinə sinxron tərcümə deyiləcək mühazirə "Orta Asiyada eksperimental kinonun inkişafı" mövzusuna həsr olunacaq.

Mühazirə çərçivəsində söhbət hər bir konkret ölkə deyil, daha çox kinematoqrafda mövzular və meyllər, həmçinin aparıcı adlardan (Saşa Uqay, Ümidə Əhmədova, Aleksey Rumyantsev, Ulan Djaparov, Zoya Falkova və s.) bəhs edəcək.

Mühazirəçi Almagül Menlibayeva və Saodat İsmayılovanın yaradıcılığında feminist və ekoloji problemlərin kəsişməsi mövzusuna da toxunacaq. Bundan əlavə, mühzirədə həmçinin "İnstagram stories" və "TikTok"un eksperimental film və videoart sənətini necə "öldürdüyü" barədə danışılacaq.

Qeyd edək ki, Aleksey Ulko (d.1969, Səmərqənd) – Səmərqənd Universitetində ingilis dilini öyrənib və Ekseter Universitetində təhsil sahəsi üzrə magistr dərəcəsi alıb. Səmərqənd Xarici Dillər İnstitutunda ingilis dili və stilistikadan dərs deyib, 2003-cü ildən isə ingilis dili və mədəni tədqiqatlar üzrə məsləhətçi vəzifəsində çalışır. 2007-ci ildən Orta Asiyanın müasir mədəniyyəti və incəsənəti haqqında məqalələr yazır və məruzələrlə çıxış edir, eksperimental kino və incəsənət layihələri ilə məşğul olur. ESCAS, AAH, CESS kimi cəmiyyətlərin və "The Garage Journal"ın redaksiya heyətinin üzvüdür. 2021-ci ildən Daşkənddə Mədəniyyət və İncəsənətin İnkişafı Fondunun nəzdində Müasir İncəsənət Mərkəzində gənc rəssamlar laboratoriyasının kuratorudur.