Şəhid Şahin Bayram oğlu Qədirov 1990-cı il yanvarın 3-ü Bakı şəhəri Qaradağ rayon Çeyildağ qəsəbəsində anadan olub. 1996-cı ildə Çeyildağ qəsəbəsində yerləşən Siyavuş Muradov adına 224 saylı orta məktəbin 1-ci sinfinə gedib, 2005-ci ildə həmin məktəbi bitirib.

Hələ məktəb vaxtından idmana böyük həvəsi olan Şahin bir neçə idman növü ilə məşğul olub, Bakı şəhərində keçirilən yarışlarda iştirak edərək uğur qazanıb. Şahingil ailədə 5 uşaq olublar. 2 qardaş 2 bacısı var. Uşaqların içində ən deyib-gülən, ən zarafatcılı Şahin olub.

2008-ci ilin yanvar ayının 5-də Bakı şəhəri Qaradağ rayon Hərbi Komissarlığı tərəfindən hərbi xidmətə çağırılıb. Hərbi xidmətdə göstərdiyi yüksək xidmətlə hamıdan fərqlənib. Elə xidmətdə olarkən Xüsusi Təyinatlı Qüvvələrin kəşfiyyat qrupuna imtahan verir və qəbul olur qəhrəmanımız. Müddətli hərbi xidməti yüksək səviyyədə bitirən Şahin, ömrünü məhz hərb sənətinə xidmətdə keçirmək qərarına gəlir və Xüsusi Təyinatlı Qüvvələrin Yaşmada yerləşən “N” saylı hərbi hissəsində gizir kimi fəaliyyətini davam etdirir.

Şahinin anası, Bakı Şəhər Mədəniyyət Baş İdarəsi Çeyidağ qəsəbə klubunun direktoru Zərifə xanım Qədirova: “Şahin Vətənə o qədər bağlı idi ki, bütün təlimlərdə həvəslə iştirak edərək yüksək nəticə göstərir. 2013-cu ildə "AZƏRBAYCAN RESPUBLİKASI SİLAHLI QÜVVƏLƏRİNİN 95 İLLYİ" yubiley medalı ilə təltif olunur. 2016-cı ildə 4 gün davam edən Aprel döyüşlərində xüsusi qəhrəmanlıq göstərir. Lələtəpənin azad olunmasında böyük əməyi olur. Aprel döyüşlərində göstərdiyi qəhrəmanlığa görə oğlum orden və medallarla təltif olunub” – deyə göz yaşını saxlaya bilməsə də övladı haqqında qürurla danışır.

Şahin Qədirov 20 iyun 2019-cu ildə "AZƏRBAYCAN ORDUSUNUN 100 İLLİYİ" medalı ilə, 26 iyun 2019-cu ildə "QÜSURSUZ XİDMƏTƏ GÖRƏ" 3-cü dərəcəli medalla təltif olunub.

12 il Yaşmada yerləşən "N" saylı XTQ (“Ölüm Mələkləri”) hərbi hissəsində gizir olan Şahin digər Vətən övladları kimi Qarabağın azadlığı, ölkəmizin ərazi bütövlüyünün bərpası uğrunda Ali Baş Komandanın hücum əmrini səbrsizliklə gözləyir.

2020-ci il sentyabrın 27-də düşmən təxribatına cavab olaraq əks-hücumla başlayan Vətən müharibəsində igidliklə iştirak edən Şahinimiz döyüş yoldaşları kimi arzularına çatdıqlarına sevinir və düşmənlə üz-üzə gələndə dəfələrlə böyük cəsarət nümayiş etdirir.

Zərifə xanım: “Hər dəfə evlə əlaqə saxlayanda başınızı dik tutun, alnınız açıqdır, düşməni qıra-qıra gedirik deyirdi. Axırıncı dəfə oktyabrın 4-ü ondan zəng gəlir” - deyir.

Şahin oktyabrın 5-də Cəbrayıl rayonu istiqamətində gedən döyüşlərdə yaralanır. Yoldaşları onu geri qayıtmağa məcbur etsələr də o geriyə dönmür. Yaralı ola-ola vuruşur, elə Cəbrayılda gedən döyüşlərdə Şəhidlik zirvəsinə ucalır.

Şahin ailəli idi. Ondan Vətənə yadigar 6 yaşlı oğlu Bayram qalıb. Balaca Bayram anasından xahiş edib ki, ona əsgər paltarı geyindirsin və şəklini çəksin. O, əlinə oyuncaq avtomatını götürüb, əsgər paltarında şəkil çəkdirərək, anasından hər iki şəkli birləşdirməyi xahiş edib. Ailənin də ən böyük arzusu Bayramın atası kimi qəhraman oğul olmasıdır.

“Ot kökü üstə bitər” – deyib müdriklərimiz. Bu gün dünyanı hələ uşaq gözü ilə seyr edən, lakin qismətinə ata şəhadətini körpəlikdən yaşamaq düşən balaca Bayram böyüdükcə dərk edəcək ki, onların sülh içində xoşbəxt gələcəyi məhz Şahin kimi ölümü gözə alıb rəşadətlə döyüşən Şəhid hərbçilərimizin, Şuşada və cümlə Qarabağda bayrağımızı yüksəklərə qaldıran cəsur Qazilərimizin şərəfli əzminin bəhrəsidir.   

Gizir Şahin Bayram oğlu Qədirov Azərbaycan Respublikası Prezidentinin müvafiq Sərəncamları ilə "Vətən uğrunda", “Döyüşdə fərqlənməyə görə”, “Cəbrayılın azad olunmasına görə” medalları ilə təltif olunub.