İyunun 19-da Azərbaycanın İordaniya Haşimilər Krallığındakı səfirliyi və İordaniya Filatelist və Numizmatika Cəmiyyətinin birgə təşkilatçılığı ilə Əmman şəhərində İordaniya Milli Kitabxanasının inzibati binasında birinci İordaniya–Azərbaycan Filateliya sərgisi açılıb.

AZƏRTAC xəbər verir ki, tədbirin rəsmi açılışı zamanı hər iki ölkənin Dövlət himnləri səsləndirilib.

Azərbaycan İordaniyadakı səfiri Eldar Səlimov və İordaniya Filatelist və Numizmatika Cəmiyyətinin sədri Cəlil Tannus açılış nitqləri ilə çıxış ediblər.

Səfir Eldar Səlimov çıxışında Azərbaycan markalarının tarixindən bəhs edib, bu markaların ölkəmizin milli kimliyi, mədəni irsi və tarixi yaddaşını əks etdirdiyini bildirib. O, həmçinin 1919-cu ildən başlayan Azərbaycan filateliyasının inkişaf yolu, müstəqillik dövründə “Azərpoçt” MMC-nin bu sahədə gördüyü işlər barədə ətraflı məlumatı tədbir iştirakçılarının diqqətinə çatdırıb.

İordaniya Filatelist və Numizmatika Cəmiyyətinin sədri Cəlil Tannus çıxışında sərginin iki ölkə arasında mədəni əlaqələrin möhkəmləndirilməsində əhəmiyyətli rol oynadığını qeyd edib, poçt markalarının tarixi və mədəni dəyərini vurğulayıb. O, həmçinin Azərbaycan səfirliyi ilə birgə əməkdaşlıq çərçivəsində son illərdə keçirilmiş digər mühüm tədbirləri – 2023 və 2024-cü illərdəki sərgi və təqdimatları xatırladıb və bu əməkdaşlığın davamlı olacağına ümidvar olduğunu bildirib.

Tədbir çərçivəsində Azərbaycan və İordaniya arasında filateliya sahəsində əməkdaşlığı əks etdirən video nümayiş olunub və qarşılıqlı olaraq xatirə plaketləri təqdim edilib.

Sərgi iştirakçıları tərəfindən böyük maraqla qarşılanan ekspozisiyada həm Azərbaycan, həm də İordaniya markaları nümayiş olunur, bu sənət nümunələrində iki ölkənin tarixi, mədəniyyəti və təbiətinə dair zəngin məlumatlar öz əksini tapır.

Sərgi üç gün davam edəcək.

Şıxəli Əliyev

AZƏRTAC-ın xüsusi müxbiri

Qahirə