Gülşən Ağadadaş qızı Qurbanova 1950-ci il dekabrın 19-da Bakıda anadan olub. 1974-cü ildə Azərbaycan Dövlət Mədəniyyət və İncəsənət Universitetinin Dram və kino aktyorluğu fakültəsini bitirən Gülşən Qurbanova Azərbaycan Dövlət Gənc Tamaşaçılar Teatrında fəaliyyətə başlayıb və ömrünün son gününə qədər bu kollektivdə çalışıb.

Xalq artisti Gənc Tamaşaçılar Teatrının səhnəsində Mərcan (“Mənim nəğməkar bibim”, Ə.Əylisli), Eyzəngül (“Şirinbala bal yığır”, S.Qədirzadə), Çiçək (“Ana laylası”, İ.Coşğun), Nabat (“Tamahkar”, S.S.Axundov), Şahnaz (“Şəhərli oğlan”, Q.Rəsulov), Almagül (“Fudzi dağında qonaqlıq”, Ç.Aytmatov), Gülarə (“Məhəbbət novellası”, Ş.Xurşud və Ə.Hacıyev), Nera (“Zəncirlənmiş Prometey”, C.Məmmədov), Gülnaz (“Pul dəlisi”, Ə.Orucoğlu), Ana (“Bala bəla sözündəndir”, Ə.Əmirli) və s. yaddaqalan obrazlar qalereyası yaradıb.

Gülşən Qurbanova 1989-cu ildə “Azərbaycan Respublikasının Əməkdar artisti”, 1998-ci ildə isə “Xalq artisti” fəxri adlarına layiq görülüb.

2006-cı il noyabrın 17-də teleçəkilişdən qayıdan Gülşən Qurbanova üçüncü dəfə infarkt keçirərək vəfat edib.