Azərbaycan mədəniyyətinin görkəmli nümayəndəsi, böyük bəstəkar, SSRİ Xalq artisti, Sosialist Əməyi Qəhrəmanı, SSRİ və Azərbaycan Dövlət mükafatları laureatı, akademik Qara Qarayevin ev-muzeyində dahi bəstəkarın 107 illiyinə həsr olunmuş tədbir keçirilib.

AZƏRTAC xəbər verir ki, tədbirdə musiqişünas, Əməkdar incəsənət xadimi professor Zümrüd Dadaşzadə, Xalq artisti Ülviyyə Hacıbəyova, TÜRKSOY-un keçmiş Baş katibi Düsen Kaseinov və digər mədəniyyət və incəsənət nümayəndələri iştirak ediblər.

Tədbiri Azərbaycan Musiqi Mədəniyyəti Dövlət Muzeyinin direktoru, Əməkdar mədəniyyət işçisi Alla Bayramova açıb.

Dahi bəstəkarın qızı Züleyxa Qarayeva-Bağırova tədbir iştirakçılarına təşəkkür edib: “Atamın sağlığında bu günü həmişə dostlar, qohumlar və sevimli tələbələri ilə birlikdə qeyd edirdik. İllər keçsə də onun sənətinə hörmət bəsləyənlər onu yad etmək üçün bir araya toplaşmağa davam edirlər. Hər kəsə bu sevgiyə görə minnətdaram”.

Ev-muzeyinin direktoru Lətifə Kazımova çıxışında tanınmış bəstəkarın həyat və yaradıcılıq yolundan, musiqi mədəniyyətinin inkişafındakı misilsiz xidmətlərindən danışıb.

Bütün çıxışlar Azərbaycan Musiqi Mədəniyyəti Dövlət Muzeyinin zəngin kolleksiyası əsasında hazırlanmış slayd-şou ilə müşayiət olunub.

Daha sonra Üzeyir Hacıbəyli adına Bakı Musiqi Akademiyasının tələbələri, respublika və beynəlxalq müsabiqələrin laureatları Qəmər Kərimli (skripka), Atabala Manafzadə (fortepiano), İluzər İbrahimzadə (fortepiano), Cavidan Rəsulov (klarnet), Cəmalə Abdinzadə (fortepiano), Aysun Mahmudzadə (vokal), Zəhra-Cahan Şıxəliyeva (fortepiano), Cəlalə İsmayılzadə (violonçel), həmçinin Azərbaycan Milli Konservatoriyasının baş müəllimi, sənətşünaslıq üzrə fəlsəfə doktoru Svetlana Əhmədovanın (fortepiano) ifasında Qara Qarayev və Fərəc Qarayevin əsərlərindən ibarət konsert proqramı başlayıb.

Konsert proqramından sonra Qara Qarayevin həyat yoldaşı Tatyanaya həsr etdiyi “Prelüdiya lya major” əsərinin videoyazısı nümayiş etdirilib. Əsər Qara Qarayev adına Azərbaycan Dövlət Kamera Orkestrinin ifasında, dirijor Elşad Bağırovun rəhbərliyi ilə səsləndirilib.

“Bu gün bəstəkar Qara Qarayevin anadan olmasının 107 ili tamam olur. Bu gün bizim evin qapıları hamının üzünə açıq olub. Atamın tələbələri, həmkarları, dostları onu təbrik etmək üçün ziyarətinə gəliblər”, – bu sözləri AZƏRTAC-ın müxbiri ilə söhbəti zamanı bəstəkarın qızı pianoçu Züleyxa Qarayeva-Bağırova deyib. O qeyd edib ki, bəstəkarın doğum günü hər il təntənə ilə qeyd olunur.

“Bu gün bizim üçün dəyişməz olaraq qalır. Hər il ev-muzeyimizin qapıları qonaqlar üçün açılır. İllər keçsə də atamın xatirəsi yaşayır. Onun doğum gününü dostların və sənətinin pərəstişkarlarının əhatəsində keçirməyə davam edirik”, - deyə həmsöhbətimiz vurğulayıb.

Tədbirin sonunda sənətşünaslıq üzrə fəlsəfə doktoru, Əməkdar incəsənət xadimi, professor Zümrüd Dadaşzadə Qara Qarayevin musiqiyə olan misilsiz sədaqəti, kamilliyə can atması və özünə qarşı yüksək tələbkarlığı barədə danışıb. Onun mükəmməl intizamı barədə söyləyərək qeyd edib ki, bəstəkarın yaradıcılığı yeni nəsil musiqiçilərə ilham verməyə davam edir. Professor gənc ifaçılara dahi bəstəkarın əsərlərini yüksək səviyyədə təqdim etdiklərinə görə təşəkkürünü bildirib.