Oqtay Qədir oğlu Zülfüqarov 1929-cu il mayın 31-də anadan olub. Uşaqlıqdan musiqiyə həvəsi, yüksək musiqi duyumu olan O.Zülfüqarov 1947-ci ildə A.Zeynallı adına Musiqi Texnikumunun violonçel sinfinə daxil olub,məşhur musiqiçi A.Şvartsdan dərs alıb. Bu dövrdə violonçel ifaçılığı ilə bərabər, bəstəkarlıqla da məşğul olub, violonçel üçün pyeslər və bir neçə mahnı yazıb.

1949-cu ildə gənc musiqiçilərin bəstələdiyi ən yaxşı mahnılar üzrə keçirilən müsabiqədə III yer tutub. O,1951-ci ildə Ü.Hacıbəyov adına Azərbaycan Dövlət Konservatoriyasının simli alətlər şöbəsinə - violonçel sinfinə daxil olub,1958-ci ildə bəstəkarlıq şöbəsində təhsilini Q.Qarayevin sinfində başa vurub.

Oqtay Zülfüqarov bəstəkarlıq texnikasına yiyələnərək musiqinin müxtəlif janrlarına müraciət edib.Onun iki simfoniyası, violonçel, fleyta və simfonik orkestr üçün konsertləri, “Şənlən mənim xalqım” uvertürası, “Qız ulduz”, “Meşə nağılı”, “Pişik və sərçə” nağıl-operaları, “Məlikməmməd” nağılı əsasında yazdığı “Sehrli alma ” uşaq baleti, “Əlibaba və 40 quldur” librettosu, simli kvartetləri, fortepiano triosu, mahnı və romansları musiqi tariximizdə özünəməxsus yer tutub.

Bəstəkarın 300-ə qədər uşaq mahnısı var. Bunlardan “Ovçu oğlan”, “Dumbulumu çalaram”, “Rəssam”, “Kuklam”, “Nə əzizsən, vətən”, “Əziz ana, can ana” və başqalarının adını çəkə bilərik. Adından da göründüyü kimi, bu mahnılar müxtəlif mövzuları əhatə edərək körpələrdə ana, vətən, təbiət, gözəllik, məktəb, müəllim və s. haqda daha aydın təsəvvür yaradıb.

1958-ci ildə Azərbaycan Bəstəkarlar İttifaqının üzvü olub,ittifaqın bütün tədbirlərində çox fəal iştirak edib. Bəstəkar həmçinin Dövlət Uşaq Filarmoniyasının bədii rəhbəri olub. Uşaqların sevimli bəstəkarı 1967-ci ildən rəsmlə, xalq sənəti (dekorativ təsviri sənət) ilə ciddi məşğul olmağa başlayıb. Onun rəsmlərində simvolika fantastika ilə birləşib. Bəstəkar rəssamın çoxcəhətli, geniş fəaliyyəti dövlət tərəfindən yüksək qiymətləndirilib. Uzun illər ‘‘Tumurcuq” və ‘‘Aysel” Uşaq Mahnı Teatrı Oqtay Zülfüqarovun rəhbərliyi altında Azərbaycan Dövlət Televiziyasında verilişlər hazırlayıb. Azərbaycan musiqi mədəniyyətinin zənginləşdirilməsi sahəsində səmərəli xidmətlərinə görə Oqtay Zülfüqarov 1972-ci ildə “Əməkdar incəsənət xadimi”, 2000-ci ildə “Xalq artisti” fəxri adına layiq görülüb. 2009-cu ildə isə anadan olmasının 80 illiyi münasibəti ilə “Şöhrət” ordeni ilə təltif olunub. Oqtay Zülfüqarov 2016-cı il avqustun 31-də 87 yaşında vəfat edib. Əvəzolunmaz sənətkar II Fəxri Xiyabanda dəfn edilib.