Azərbaycan sovet memarı və memarlıq tarixçisi, professor, SSRİ Memarlıq Akademiyasının həqiqi üzvü, müxbir üzv, Azərbaycan SSR Elmlər Akademiyasının akademiki, SSRİ xalq memarı, Sosialist Əməyi Qəhrəmanı, Azərbaycan SSR əməkdar incəsənət xadimi, SSRİ dövlət mükafatı laureatı, Azərbaycan SSR Dövlət mükafatı laureatı, memarlıq doktoru Mikayıl Useynov 1905-ci il aprelin 19-u Bakı şəhərində dünyaya gəlib.

Gənclik illərindən memarlığa həvəs göstərib və bu məhəbbətə ömrü boyu sadiq qalıb. O, 200-dən çox layihə yaradıb və bunların,demək olar, hamısı həyata keçirilib. Dünyaşöhrətli görkəmli memar M.Ə.Useynov 1992-ci il 7 oktyabrda Bakıda vəfat edib. M.Useynov I Fəxri Xiyabanda dəfn edilib

Mikayıl Useynov 1922-1929-ci illərdə M.Əzizbəyov adına Azərbaycan Politexnik İnstitutuna daxil olub və mühəndis-memar ixtisası üzrə mühəndis-inşaat fakültəsini bitirib. 1930-1959-cu illərdə memar, sonradan isə "Azərdövlətmemarlayihə"də (indiki "Azərdövlətlayihə" DBLİ) 1-ci memarlıq emalatxanasının rəhbəri olub. 1960-1990 illərdə "Azərdövlətlayihə"də məsləhətçi işləyib. 1947-1992-ci illərdə Azərbaycan Memarlar İttifaqının sədri olub.

1945-ci ildə Azərbaycan SSR EA-nın fizika-texniki elmlər və neft bölməsi üzrə həqiqi üzv olub. İlk memarlıq və nəzəri əsərlərini 1946-cı ilədək S.Dadaşovla birgə yaradıb. 1948-1988-ci illərdə Azərb. SSR EA Memarlıq və İncəsənət İnstitutunun direktoru işləyib. 1982-ci ildə Bakı şəhərinin fəxri vətəndaşı olub.

Az vaxtda onun layihələri əsasında Bakıda, Gəncədə, Naxçıvanda, Şəkidə, eləcə də Düşənbədə, Moskvada və s. şəhərlərdə mədəni-məişət binaları tikilib. Şərq və Qərb memarlıq məktəbinin sintezindan yararlanan Mikayıl Useynov əzəmətli yaşayış və ictimai binaların lahiyələrini hazırlayıb. Bakıdakı "Alimlər evi" (1946), Ü.Hacıbəyov adına "Azərbaycan Dövlət Konservatoriyası" (1937-1939), "Nizami adına Ədəbiyyat Muzeyi"nin (1946), “Nizami” kino mərkəzi (1937-1939), Azərb. Politexnik İnstitutu (1931-1933), "Bakı Soveti" işçiləri üçün yaşayış (hazırda Respublika Nazirlər Kabineti binası, 1938-1941) binaları onun layihələri əsasında inşa olunub.

Memarın simmetrik kompozisiya şəklində həll edilmiş layihəsinə əsasən Hökumət Evinin yaninda 10 mərtəbəli 2 yaşayış binası, 16 mərtəbəli evlər (hamısı 1970 illər), Lenin (indiki Azadlıq) meydanının qərb tərəfində 16 mərtəbəli "Azərbaycan" (1969; SSRİ Nazirlər Sovetinin mükafatı, 1978), şərq hissəsində isə "Abşeron" (1985) mehmanxanaları tikilib. Useynovun 60-80-ci illər yaradıcılıq fəaliyyətində Bakıda V.İ.Lenin meydanı (indiki Azadlıq meydanı) ansamblının tikintisi əhəmiyyətli yer tutur.

1985-ci ildə Londondakı Kral Asiya Cəmiyyətinə fəxri üzv seçilib. Sovet Azərbaycanı memarlığının yadda qalan nailiyyətləri və xüsusən onun paytaxtı Bakının nailiyyətləri Londonda keçirilən sərgidə nümayiş etdirilib. Bu sərgi "Bakının memarlığı" adı altında, 1985 ilin yazında Britaniya memarları Kral institutunun qalereyasında "İngiltərə - SSRİ" dostluq cəmiyyəti tərəfindən təşkil olunub.

Mikayıl Useynovun 1946-cı ildən sonrakı memarlıq işləri: M.F. Axundov adına Azərbaycan Dövlət kütləvi kitabxanası (1960), Azərb. SSR EA şəhərciyi kompleksi (1951-1966), Bakı Metropoliteni "Nərimanov" (1967), "Nizami" (1976) və "Elmlər Akademiyası" (1985) stansiyaları; "Moskva" mehmanxanası (1978).

Dünya şöhrətli memar, alim, pedaqoq, akademik Mikayıl Useynov Azərbaycan memarlığının inkişaf tapmasında böyük xidmətləri olub.1992 ildə Beynəlxalq Memarlıq Akademiyasının Moskvadakı şöbəsinə fəxri üzv seçilib.1992-ci ildə M.Useynovun təşəbbüsü ilə Şərq ölkələri Beynəlxalq Memarlıq Akademiyası yaradılıb və ilk prezidenti Mikayıl Ələsgər oğlu Useynov olub.