Bakı Şəhər Mədəniyyət Baş İdarəsinin G.Şaroyev adına 35 nömrəli onbirillik musiqi məktəbinin fortepiano ixtisası üzrə VI sinif şagirdi Ləman Seyidova yay tətilində bir neçə Beynəlxalq müsabiqə və festivallara qatılıb.

Ləman 1-15 iyul tarixlərində Xorvatiyanın Trogir şəhərində keçirilən “Summer Con Spirito 2019” beynəlxalq musiqi məktəbində və Beynəlxalq festivalında iştirak edərək professor Mira Marçenkodan ustad dərsləri alıb.  Altı dəfə sinif konsertində iştirak edib.

O, 22-28 iyul tarixlərində isə İtaliyanın Bresiya şəhərində keçirilən “Talent Music Summer Courses and Festival 2019” adlı müsabiqəyə qatılıb. İtaliyanın Breşiya şəhərində hər il dünyanın istedadlı gənc pianoçuları üçün yay musiqi kursları və festivalı keçirilir. On yaşlı azərbaycanlı Ləman Seyidova da bu tədbirə dəvət alıb və görkəmli pianoçu Sergey Milşteynin sinfində ustad dərsləri keçib. Breşiya şəhərində kurs keçən və festivalda pianoçu kimi iştirak edən 12 nəfərdən 6 istedadlı gəncin siyahısında Ləman Seyidovanın adı çəkilərək, ona orkestrlə birgə çıxış etmək fürsəti verilib. “Santa Maria del Carmine” kilsəsində orkestrlə birgə konsertdə “W.A.Mozart  Piano Concerto 12”  əsərini məharətlə ifa edib. Konsertdən sonra onun ifası “Talen Music Sumer Courses and Festival 2019”  youtube kanalında yerləşdirilib.

Ləman 20-23 avgust tarixlərində İtaliyada “Wunderkinder  a Toblach 2019” keçirilmiş “Gioventu Festivalı” işgüzar görüşündə iştirak edərək, oradan Dobbiaco İtaliya festivalına dəvət alır. İtaliyada nadir istedada malik olan ifaçılarla bağlı hər il keçirilən “Wunderkinder a Toblach” dəyərləndirilməsinə görə 2019-cu ilin siyahısına Ləman Seyidovanın adı da əlavə edilib. Beləliklə, seçilmiş 7 gənc pianoçudan biri də Ləman Seyidovadır. Onun bu uğurlarını nəzərə alaraq İtaliyanın Dobiakko bölgəsində “Festival della Gioventu 2019” adlı seminara dəvət ediblər. 

2019-cu il üzrə dəyərləndirmədə ən istedadlı uşaqların siyahısı:

Anatolii Boqdanov (11 yaş, Rusiya Federasiyası) Cakomo Korbetta (13 yaş, İtaliya) Oleksandr Fedürko (9 yaş, Ukrayna) Kasper Kuklinski (14 yaş, Polşa) Kolin Putz (12 yaş, Almaniya) Ləman Seyidova (10 yaş, Azərbaycan) Karla Roman Vaskez (12 yaş, İspaniya)

13-15 sentyabr tarixlərində Ləman Seyidova Rusiya Federasiyasının paytaxtında “Musiqili Krasnoqorsk” festivalının iştirakçısı kimi bu festivala öz damğasını vura bilib. Ona görə də çox az adamlara qismət olan “Zəfər Muzeyi”ndə (MузееПобеды) təşkil olunan konsertdə çıxış etmək imkanı qazanıb.

Ləman  bu müsabiqə və festivallarda  V.A.Motsartın 12 N-li  Konsertini (II, III hissələr), İ.Haydnın Sonata c-moll I hissəsini, N.Metnerin “Nağıl” f-moll, P.Çaykovskinin “Mart”, F.Mendelsonun “Skerso”, F.Şopenin  14 N-li Etüd f-moll əsərlərini ifa edib.

Ləman öz yaşıdlarından fərqli olaraq yay tətilini səmərəli keçirib.

Onun müəllimi, Əməkdar müəllim Kamilla Əmirovadır.