Bakı Şəhər Mədəniyyət Baş İdarəsinin Şövkət Ələkbərova adına 20 nömrəli onbirillik musiqi məktəbinin müəllimi Urfan Cəfərov Amerikanın Nyu-York şəhərində keçirilmiş "American Protégé International Vocal Competition 2022" Beynəlxalq Opera ifaçılarının Vokal Müsabiqəsində iştirak edərək 21 ölkə təmsilçiləri arasından I yerin qalibi olub.

“American Protégé International Vocal Competition 2022” Beynəlxalq Opera ifaçılarının Vokal Müsabiqəsi çoxrəqabətli mühitdə özlərini sınamaq istəyən müğənnilər üçündür və Azərbaycan ilk dəfədir ki, musiqi yarışmasında belə bir nailiyyət qazanıb. Müsabiqədə yaşından, irqindən, millətindən asılı olmayaraq bütün solo vokalçılar iştirak edə bilərlər.

Urfan Cəfərov I yerə çıxmaqla yanaşı, Carnegie Holl-da keçiriləcək çox nüfuzlu vokalçıların müsabiqəsinin final mərhələsinə birbaşa vəsiqə qazanıb.

Bu Urfan müəllimin yeganə qələbəsi deyil. Respublika və beynəlxalq müsabiqələr laureatı bu yaxınlarda Ukraynanın Truskavets şəhərində keçirilən Müslüm Maqomayevin xatirəsinə həsr olunmuş Opera və Estrada  Vokalçıların IV Beynəlxalq Müsabiqəsində 18 müxtəlif ölkələrdən gələn (16-40 yaş) ifaçılar arasında müsabiqənin əsas mükafatına - “Qran-Pri” mükafatına layiq görülüb.

Qeyd edək ki, Azərbaycanın Xalq artisti, professor, dünyaşöhrətli opera müğənnisi Xuraman Qasımovanın tələbəsi olmuş Urfan Cəfərov həmçinin Gənclər Mükafatı laureatı, gənc opera müğənniləri arasında Avropa çempionu, Üzeyir Hacıbəyli adına Bakı Musiqi Akademiyasının məzunudur.

Urfan Cəfərovu təbrik edir, ona yeni-yeni yaradıcılıq uğurları arzulayırıq!