30 sentyabr 2025-ci il tarixində Azərbaycan Milli İncəsənət Muzeyində “Azərbaycan təsviri sənəti: klassikadan postmodernizmə” adlı yeni daimi ekspozisiyanın açılışı keçirilmişdir.

Tədbirdə Azərbaycan Milli İncəsənət Muzeyinin direktoru, Əməkdar mədəniyyət işçisi Şirin Məlikova, Azərbaycan Rəssamlar İttifaqının sədri, Xalq rəssamı Fərhad Xəlilov, Xalq rəssamı, akademik Ömər Eldarov və Azərbaycan Memarlar İttifaqının sədri, Əməkdar memar Elbay Qasımzadə çıxış edərək ekspozisiyanın milli təsviri sənət tarixində xüsusi əhəmiyyətini vurğulamışlar.

Yeni ekspozisiya ötən əsrin 50-ci illərindən başlayaraq 2000-ci illərə qədər Azərbaycan təsviri sənətinin müxtəlif mərhələlərini əhatə edir. Burada 80-ə yaxın rəngkarlıq, qrafika və heykəltəraşlıq nümunəsi nümayiş olunur.

Müxtəlif nəsillərə mənsub rəssam və heykəltəraşların yaradıcılığını bir arada təqdim edən ekspozisiya milli incəsənətin bütöv mənzərəsini yaradır. Zallar mövzular üzrə bölünərək Bakının mənzərələrini, görkəmli şəxsiyyətlərin portretlərini, gündəlik həyat səhnələrini, mücərrəd üslublu əsərləri, həmçinin klassik və müasir plastik dilin vəhdətini əks etdirir.

Ekspozisiyada Tağı Tağıyev, Vəcihə Səmədova, Bədurə Əfqanlı, Asəf Cəfərov, Mirnadir Zeynalov, Fərhad Xəlilov, Çingiz Fərzəliyev, Aydan Salahova və digər görkəmli rəssamların əsərləri təqdim olunur. Heykəltəraşlıq bölməsində isə Cəlal Qaryağdı, Elmira Hüseynova, Natiq Əliyev, Sahib Quliyev, Teymur Rüstəmov kimi sənətkarların müxtəlif üslublarda yaratdıqları əsərlər nümayiş etdirilir.

Yeni ekspozisiya XX əsrin ortalarından müasir dövrədək Azərbaycan təsviri sənətinin zəngin yaradıcılıq xəttini izləməyə imkan verir və milli incəsənətin dinamik inkişafını əks etdirir.