İyulun 4-də Azərbaycanın qədim sənət və mədəniyyət mərkəzlərindən olan Şəkidə növbəti musiqi bayramına - Şəki “İpək yolu” XIV Beynəlxalq Musiqi Festivalına start verilib.

Mədəniyyət Nazirliyi, Azərbaycan Bəstəkarlar İttifaqı və Şəki Şəhər İcra Hakimiyyətinin birgə təşkilatçılığı ilə reallaşan və üç gün davam edəcək musiqi festivalında Azərbaycan, Türkiyə və Çinin tanınmış musiqi kollektivləri, istedadlı musiqiçilər iştirak edirlər.

AZƏRTAC-ın bölgə müxbiri xəbər verir ki, festivalın proqramına uyğun olaraq, iyulun 4-də Şəki şəhərindəki “Yuxarı Karvansaray” mehmanxana kompleksində musiqisevərlərə ilk konsert proqramı təqdim olunub. Bakı Beynəlxalq Multikulturalizm Mərkəzinin dəstəyi ilə gerçəkləşən konsertdə Azərbaycanda yaşayan azsaylı xalqların xor, mahnı və rəqs kollektivləri rəngarəng proqramla çıxış ediblər. Müxtəlif etnik qrupların - talış, avar, ləzgi, molokan, tat icmalarının folklor qruplarının çıxışı tamaşaçılar tərəfindən maraqla qarşılanıb.

Konsertə başlamazdan əvvəl Bakı Beynəlxalq Multikulturalizm Mərkəzinin icraçı direktoru Rəvan Həsənov çıxış edərək, Azərbaycanın qədim tarixə malik, maddi və mənəvi zənginliyi ilə seçilən bir diyarında - Şəki şəhərində möhtəşəm musiqi festivalının açılışında iştirak etməyin qürurverici olduğunu bildirib.

Şəki “İpək yolu” Beynəlxalq Musiqi Festivalında Azərbaycanda yaşayan xalqların musiqi, mədəniyyət nümunələrinin nümayiş olunduğunu diqqətə çatdıran Mərkəzin icraçı direktoru deyib: “Bu, çox əhəmiyyətlidir. Ona görə ki, vaxtilə Azərbaycan xalqının Ulu Öndəri Heydər Əliyev bildirmişdi ki, bir xalq özündə nə qədər çox mədəniyyəti birləşdirərsə, bu, onun zənginiyidir. Bu, müstəqilliyimizi bərpa etdikdən sonra Azərbaycan multikultiralizminin, tolerantlığının şüarına çevrilib. Bu ənənə Prezident İlham Əliyev tərəfindən daim rəhbər tutulub və bu prinsip həmişə qorunub saxlanılır”.

Rəvan Həsənov bildirib ki, bu gün Azərbaycanda 30-a yaxın fərqli dildə danışan, fərqli mədəniyyətə malik xalqlar yaşayır. Azərbaycan yeganə dövlətdir ki, bu müxtəlifliyi özü üçün sərvət hesab edir: “Bu gün fərqli dillərdə musiqi nümunələri, fərqli ritmlər eşidəcəyik. Ancaq bu fərqli musiqi nümunələri bir ritm yaradır. O ritm əslində Azərbaycan tolerantlığının, Azərbaycan multikultiralizminin döyünən ürəyidir”.

Qeyd olunub ki, ölkəmizdə müxtəlif dinlərə sitayiş edən xalq və etnoslar tarixən uzunmüddətli birgəyaşayış şəraitində özünəməxsus mədəni və folklor ənənələrini qoruyub saxlayıblar. Azsaylı xalqların musiqi folkloru Azərbaycan mədəniyyətinin ayrılmaz tərkib hissəsini təşkil edir. Bu xalqların əsrlər boyu ölkəmizdə yaşayıb-yaratmaları, öz mədəni irslərini qoruyub inkişaf etdirmələri Azərbaycanda tolerantlığın və multikultiralizmin bariz sübutudur.

Sonra səhnəyə Balakən rayonunun Qabaqçöl qəsəbəsində fəaliyyət göstərən “Cahan” Avar Xalq Kollektivi çıxıb. Kollektiv 1990-cı ildə yaradılıb və 2011-ci ildə ona “Xalq kollektivi” adı verilib. “Cahan” kollektivi respublika və beynəlxalq səviyyəli festivallarda uğurla iştirak edib, dəfələrlə Mədəniyyət Nazirliyi tərəfindən fəxri fərman və diplomlarla təltif olunub. Kollektiv 2021-2022-ci illərdə Şuşa şəhərində keçirilən mötəbər “Xarıbülbül” folklor festivalında da çıxış edərək, böyük rəğbət qazanıb.

Sonra “Hovalim” Talış Folklor Qrupu çıxış edib. 2022-ci ildə Astara Rayon Mədəniyyət Mərkəzində yaradılan qrupun əsas məqsədi talış xalqına məxsus musiqi, rəqs və mərasim ənənələrini yaşatmaq, folklor nümunələrini yeni nəslə çatdırmaqdır.

“Suvar” ləzgi mahnı və rəqs ansamblının çıxışı da tamaşaçıların ürəyincə olub. 1996-cı ildə Bakıda yaradılan bu ansambl respublika və beynəlxalq festivalların laureatıdır. Orijinal rəqsləri, yüksəksəviyyəli mahnı ifaları ilə seçilən bu ansambl 2011-ci ildə “Xalq kollektivi” fəxri adına layiq görülüb.

Tamaşaçılar İsmayıllı rayonunun İvanovka kəndində fəaliyyət göstərən “Slavyanoçka” Xalq Xorunun çıxışını da maraqla qarşılayıblar. Kollektiv 1973-cü ildən fəaliyyət göstərir. Xalq xoru dəfələrlə Bakıda və respublikamızın bir çox bölgələrində müxtəlif bayram, konsert və el şənliklərində uğurla çıxış edib.

Şabran rayonunun Dağbilici kənd Mədəniyyət Evində 1986-cı ildə yaradılan “Xınayaxdı” Folklor Xalq Kollektivinin çıxışı da maraqla qarşılanıb. Kollektivin repertuarına əsasən xalq mahnıları, mövsümi mərasimlərə, əkin-biçin dövrünə və el bayramlarına aid nəğmələr daxildir. Bu folklor nümunələri həm milli ruhun yaşadılması, həm də qədim adət-ənənələrin qorunması baxımından xüsusi əhəmiyyət daşıyır.

Konsert Müslüm Maqomayevin ifa etdiyi “Azərbaycan” mahnısının sədaları altında başa çatıb.

Uğurla başa çatan konsertin sonunda Şəki “İpək yolu” XIV Beynəlxalq Musiqi Festivalının bədii rəhbəri, Azərbaycan Bəstəkarlar İttifaqının sədri, Xalq artisti, professor Firəngiz Əlizadə çıxış edərək, gözəl bir ənənəyə çevrilən və artıq on dördüncü dəfədir keçirilən “İpək yolu” Beynəlxalq Musiqi Festivalının bu dəfə də şəkililərə və qonaqlara unudulmaz anlar yaşadacağını bildirib.

Konsertin sonunda folklor qruplarının rəhbərlərinə festivalın xatirə hədiyyələri təqdim olunub.

Festivalın proqramına uyğun olaraq, iyulun 4-də axşam “Marxal” kompleksinin Yay Teatrında Şəki “İpək yolu” XIV Beynəlxalq Musiqi Festivalının təntənəli açılış mərasimi keçiriləcək.