İyunun 25-də Bakı Şəhər Mədəniyyət Baş İdarəsinin və Xətai rayon İcra Hakimiyyətinin birgə təşkilatçılığı ilə 26 İyun-Azərbaycan Respublikasının Silahlı Qüvvələri Gününə həsr olunmuş konsert proqramı təqdim edilib.

Xətai rayon Heydər Əliyev parkında keçirilən konsertdə rəsmilər, şəhid ailələri, qazilər, hərbiyyələr, ziyalılar və şəhərimizin sakinləri iştirak ediblər.

Əvvəlcə Azərbaycan Respublikasının Dövlət Himni səsləndirilib, şəhidlərimizin əziz xatirəsi bir dəqiqəlik sükutla yad edilib.

Aparıcı konserti açıq elan edərək, Azərbaycan Ordusunun keçdiyi inkişaf yolundan bəsh edb. Bildirib ki, Ulu Öndər Heydər Əliyevin 22 may 1998-ci il Sərəncamına əsasən, Əlahiddə Azərbaycan Korpusunun yarandığı gün – 26 iyun Azərbaycan Respublikasının Silahlı Qüvvələr Günü elan olunub və hər il bu tarix rəsmi dövlət bayramı kimi qeyd edilir.

Daha sonra tanınmış mədəniyyət və incəsənət ustalarının ifalarından ibarət konsert proqramı təqdim edilib. Konsertdə Xalq artistləri Röya Ayxan,  Alim Qasımov, Mələkxanım Əyyubova, Nazpəri Dostəliyeva, Əməkdar artistlər Manana Caparidze, Fərqanə Qasımova, tanınmış müğənnilər Şəmistan Əlizamanlı, Elnarə Xəlilova , Aynur Dadaşova, Leyla Ramazanlı, Mərdan Kazımov, Amil Həsənoğlu, Nuran, Sevda Yahyayeva, İlhamə Qasımova  həmçinin C.Naxçıvanski adına Hərbi Liseyin hərbi orkestri, “Azad” rəqs qrupu çıxış ediblər.

Böyük coşqu ilə keçən bayram konserti sakinlər tərəfindən rəğbətlə qarşılanıb.