Mədəniyyət Nazirliyinin Mədəniyyət üzrə Elmi-Metodiki və İxtisasartırma Mərkəzi (MEMİM) və Azərbaycan İncəsənət Məktəbinin təşkilatçılığı ilə reallaşan “Aktyorluğu öyrən” layihəsi çərçivəsində iki qrup üzrə diplom tamaşalarının nümayişi keçirilib.

Bu barədə AZƏRTAC-a MEMİM-dən məlumat verilib.

Bildirilib ki, layihə çərçivəsində Pərvin Nurəliyevanın “Cırtdanino” və Aleksandr Volkovun “Zümrüd şəhərinin sehrbazı” adlı tamaşalar izləyicilərə təqdim olunub.

Nümayişdə MEMİM-in direktoru vəzifəsini icra edən Vüqar Hümbətov və teatrşünas Dağlar Yusif layihənin əsas məqsədinin azyaşlı, yeniyetmə və gənclərdə teatr və kino sənətinə marağın artırılması, bədii zövq və istedadın formalaşdırılması, eyni zamanda, aktyorluq ixtisasının ilkin biliklərinin tədrisi olduğunu bildiriblər.

Azərbaycan İncəsənət Məktəbinin direktoru Tural Əliyev və quruluşçu rejissorlar, qrup rəhbərləri Qasım Nağı və Əməkdar artist Qurban Məsimov doqquz ay davam edən proqram çərçivəsində həftədə iki dəfə, hər biri iki akademik saat olmaqla peşəkar pedaqoqlar tərəfindən keçirilən dərslərin, uşaqların sənətə sevgisi, asudə vaxtın səmərəli təşkili, özünüifadə, səhnə plastikası baxımından önəmini vurğulayıblar.

Tədris prosesi Mədəniyyət üzrə Elmi-Metodiki və İxtisasartırma Mərkəzinin hazırladığı xüsusi proqram əsasında təşkil olunub. Proqrama tələbələrin peşəkar teatr və kino mühitində təcrübə qazanması, eləcə də tanınmış sənətçilərin iştirakı ilə keçirilən ustad dərsləri daxil edilib.

Tədris proqramını uğurla tamamlayan iştirakçılar sertifikat və diplomlarla təltif olunublar.

Digər qrupların diplom tamaşası iyulun 7-də keçiriləcək.