Azərbaycan Bəstəkarlar İttifaqının (ABİ) yaranma günü münasibətilə İttifaqın konsert salonunda gənc bəstəkarların yaradıcılığına həsr olunmuş kamera musiqisi konserti keçirilib.

Bu barədə AZƏRTAC-a Azərbaycan Bəstəkarlar İttifaqından məlumat verilib.

Bildirilib ki, ABİ-nin katibi, sənətşünaslıq üzrə fəlsəfə doktoru, professor Elnarə Dadaşova çıxış edərək konsertin məhz İttifaqın yarandığı gündə keçirilməsinin rəmzi məna daşıdığını vurğulayıb.

Diqqətə çatdırılıb ki, 30 iyun 1934-cü il Bəstəkarlar İttifaqının yaranma günüdür. Azərbaycan Bəstəkarlar İttifaqının tarixi XX əsrdə meydana gəlmiş yeni musiqi mədəniyyətimizin tarixi hesab oluna bilər. Bu təşkilat cəmiyyətin həyatının ən çətin zamanlarında yaranıb və şərəfli yol keçib. Bəstəkarlar İttifaqına 1936-cı ildən ömrünün sonuna kimi dahi Üzeyir Hacıbəyli (1936-1948) rəhbərlik edib. O, dahi bəstəkarımız Üzeyir Hacıbəylinin rəhbərliyindən başlayaraq gənc milli kadrların yetişdirilməsinin və onların yaradıcılığına dəstəyinin artıq bir ənənə halını aldığını qeyd edib.

Konsertdə İlahə Qismətin “Rəngli lövhələr”, Üzeyir Məmmədovun fleyta üçün Sonata, Elvin Quliyevin “Düymələr”– piano silsiləsindən 5 Pyes, Tural Məmmədzadənin Trio - violin, violonçel və piano üçün, Aydan Əliyevanın “Hadisələr” – nəfəsli sekstet üçün Sonatina, Tahir İbişovun “Novella” – violin və piano üçün , Tural Məmmədlinin Kompozisiya – 11/8 - piano və zərb alətləri üçün əsərləri səslənib.

Konsertin sonunda Azərbaycan Bəstəkarlar İttifaqının sədri, Xalq Artisti, AMEA-nın müxbir üzvü, professor Firəngiz Əlizadə gənclərə yaradıcılıq axtarışlarında və təcrübələrində daha cəsarətli olmağı arzulayıb.

Konsertin aparıcısı ABİ-nin baş məsləhətçisi Sevda Hüseynova olub.