Əhsən Əliabbas oğlu Dadaşov 1924-cü il sentyabrın 4-də Bakı şəhərində anadan olub. Bakıdakı 22 saylı orta məktəbdə təhsil alıb. 1938-ci ildə 1 saylı Azərbaycan Dövlət Musiqi Texnikumunun (indiki Bakı Musiqi Kolleci) tar sinfinə qəbul olub. Burada Səid Rüstəmov, Mənsur Mənsurov, Ənvər Mənsurovdan dərs alıb, klassik muğam ifaçılığının xüsusiyyətlərini dərindən mənimsəyərək onu inkişaf etdirib.

Onun parlaq istedadı görkəmli bəstəkar və dirijor Səid Rüstəmovun diqqətini cəlb edib və 1940-cı ildə onu rəhbərlik etdiyi xalq çalğı alətləri orkestrinə qəbul edib. Əhsən Dadaşovun gənclik illəri dahi bəstəkar Üzeyir Hacıbəylinin rəhbərliyi ilə Azərbaycan mədəniyyətində böyük işlərin həyata keçirildiyi bir dövrə təsadüf edib.

Ötən əsrin 20-ci illərindən Ü.Hacıbəylinin təşəbbüsü ilə not sisteminin xalq çalğı alətlərinə tətbiqi, notlu xalq çalğı alətləri orkestrinin yaranması və digər bu kimi faktlar yeni ifaçılar nəslinin yetişməsinə güclü təkan verib. Onun lentə yazdırdığı “Rast”, “Orta Mahur”, “Şur”, “Zabul-Segah”, “Hümayun”, “Vilayəti - Dilkeş”, “Çahargah”, “Bayatı - Şiraz” və s. muğamları hazırda Azərbaycan Radio və Televiziya Verilişləri Şirkətinin qızıl fondunda mühafizə edilir. Tarzən muğamların və bəstəkar əsərlərinin tar və ud alətlərinin ifaçısı idi.

Görkəmli müğənni Rəşid Behbudovun ansamblının üzvü kimi dünyanın bir çox ölkələrində qastrol səfərlərində olub, Azərbaycan musiqisini təmsil edib. Azərbaycan Televiziya və Radio Verilişləri QSC nəzdində 1960-cı ildə xalq çalğı alətləri ansamblı yaradıb və ömrünün sonuna kimi bu ansamblın bədii rəhbəri olub. Hazırda “Xatirə” xalq çalğı alətləri ansamblı (bədii rəhbəri Adil Bağırov) Əhsən Dadaşovun adını daşıyır. Əhsən Dadaşov bir çox tarzənlərin sənət müəllimi olub.

Onun 40 illik yaradıcılıq fəaliyyətinə nəzər salsaq görərik ki, Əhsən Dadaşovun bütün ömrü Azərbaycan xalqına, onun musiqisinə xidmətdə keçib. Ustad tarzənin qısa, lakin mənalı ömrünün yaradıcılıq dövrünü solist, müşayiətçi, orkestr ifaçısı, ansambl rəhbəri, bəstəçi, pedaqoq-müəllim mərhələlərinə bölmək olar. Ustad tarzən heç vaxt özündən əvvəlki ifaçıları təkrar etməyib, ifa etdiyi kiçik bir musiqi parçasına da yaradıcı yanaşıb. Odur ki, onun çalğısı ilk mizrabdan tanınır.

Əhsən Dadaşov bəstəkar qəlbli sənətkar idi. O, musiqi folklorumuzu zənginləşdirən bir çox rəng, mahnı və rəqs havaları bəstələyib. “Rahab”, “Şur”, “Rast”, “Humayun”, “Segah” rəngləri bu qəbildəndir. Onun bəstələdiyi bir çox mahnılar bu gün də dillər əzbəridir. Hazırda mərhum sənətkarın adını daşıyan “Xatirə” xalq çalğı alətləri ansamblının ifasında milli mahnılarımız geniş şəkildə təbliğ edilir.

Görkəmli tarzən 1953-cü ildə “Əməkdar artist” fəxri adına layiq görülüb. Əhsən Dadaşov 1976-cı il mayın 29-da vəfat edib.