Görkəmli Amerika yazıçısı Mark Tven 1835-ci ildə Florida ştatında doğulub. Əsl adı Semuel Lenqhorn Klemens olan Mark Tven bir müddət dənizçi işləyib, öz təxəllüsünü dənizçilərin tez-tez işlətdiyi “mark tven!- ikini işarə et” ifadəsindən götürüb.

Mark Tven dörd yaşında ikən ailəsi Missisipi çayı sahilindəki Hannibal şəhərinə köçməli olur. Dörd tərəfi çayla əhatə olunan bu qəsəbə yazıçının yaradıcılığında mühüm rol oynayıb, yaratdığı məşhur romanları bu bölgədəki müşahidələrinə söykənib. Belə ki, onun ən məşhur əsərləri olan “Tom Soyerin macəraları” və “Heklberri Finnin macəraları” povestlərində təsvir olunan hadisələr məhz bu qəsəbədə cərəyan edir.

O, yaradıcılığa çox erkən yaşlarından başlayıb. İlk zamanlar yumoristik məktublar yazaraq onları qəzetlərdə çap etdirib. Sonralar bir çox məqalə və hekayələr yazıb.

Yerli bir qəzetin sifarişi ilə Aralıq dənizində gəmi səyahətinə çıxan yazıçı bu dövrdə qələmə aldığı yazılarını cəmləşdirib kitab halında nəşr etdirib.

1876-ci ildə “Tom Soyerin macəraları” povestini bitirən yazıçını bir sual narahat edib: Bu əsər kimin üçün, böyüklər, yoxsa uşaqlar üçündür? Yazıçı bu suala özü belə cavab verib: “Bu əsər həm uşaqlar, həm də böyüklər üçündür”. Yazıçının fikrincə, bütün yaşdan olan oxucular burada öz istədiklərini tapa bilərlər.

Mark Tven öz əsərlərini yazarkən, F.Rablenin “Qarqantua və Pantaqruel”, M.Servantesin “Don Kixot”, C.Sviftin “Qulliverin səyahəti” və D.Defonun “Robinzon Kruzo” romanlarının ümumi səciyyəsini, bədii üslubunu örnək kimi götürüb. Belə ki, bütün bu əsərlər eyni zamanda həm yaşlı, həm də gənc oxucular tərəfindən maraqla qarşılanıb.

1896-cı ildə 23 yaşındakı qızını, daha sonra həyat yoldaşını itirən Mark Tven ciddi ruhi sarsıntı keçirib. Daha sonra 29 yaşında olarkən kiçik qızının ölümü həyatın Mark Tvenə vurduğu son zərbə olur. Böyük yazıçı üç il əvvəl yazmağa başladığı bioqrafiyasını tamamlamağa macal tapmadan 1910-cu ildə ürək çatışmazlığından dünyasını dəyişib.

Mark Tvenin ölümündən 100 ildən çox vaxt keçsə də, əsərləri öz təravətini qoruyub saxlayır, oxunur və sevilir. Onun “Tom Soyerin macəraları” (1876), “Şahzadə və dilənçi” (1882), “Missisipidə keçən həyat” (1883),“Qoruyucu mələyə məktub” (1887), “Fərsiz Vilson” adlı əsərləri bütün dövrlər üçün aktualdır və bu gün oxucuların sevimli kitabları sırasında yer alır.

Mark Tvenin aforizmlərini təqdim edirik:

Hər günə həyatının ən gözəl günü olması üçün şans ver.

Həyatımda bir çox problemlər var idi və çoxu əsla var olmadı.

Bundan iyirmi il sonra etmədiyiniz şeylərdən ötəri, etdiklərinizdən daha çox peşman olacaqsınız. Dəmir alın və etibarlı limanlardan çıxın artıq.

Küləkləri arxanıza alın, araşdırın, xəyal edin və kəşf edin.

Dostluq qüvvətli bir bağdır. Pula ehtiyac olanda müraciət edilməzsə, ömür boyu sürər.

Cəsarət qorxunun yoxluğu deyil, qorxuya müqavimət göstərmək, qorxuya hökm etməkdir.

Hər zaman doğrunu söylə; nə dediyini xatırlamaq məcburiyyətində qalmazsan.

Təhsilin edə bilməyəcəyi heç bir şey yoxdur. Heç bir şey onun təsir sahəsinin xaricində qala bilməz. Pis əxlaqları yaxşıya çevirə bilər; pis qanunları yuyar və yerinə yenilərini qoyar; insanları mələklər səviyyəsinə çıxara bilər.

Kitab oxumayan bir kimsənin, oxuma bilməyənə qarşı bir üstünlüyü yoxdur.

İnsan 80 yaşında doğulub 18 yaşına qədər yavaş-yavaş yaşasa daha xoşbəxt olardı.

Xəyallarınızı itirdiyiniz an həyatınız sona çatdı deməkdir.

Başımızı dərdə salan pis şeylərin qaynağında bilmədiyimiz şeylər deyil, başımıza əsla gəlməyəcəyindən əmin olduqlarımız var.

Cənnət ilə cəhənnəmlə əlaqədar irəli geri danışmaq istəmirəm, çünki hər ikisində də dostlarım var.

Həyatda ehtiyac olunanlar bilməməzlik və özünə inamdır və o zaman müvəffəqiyyət şübhəsizdir.

İnsanın tək bir təsirli silahı var. Qəhqəhə.

Sabah, geridə qalan həyatımızın ilk günüdür.

Əxlaq mövzusunda ən əhəmiyyətli dərslər kitablardan deyil, yaşanan təcrübələrdən alınar.

Məni yarı yolda buraxdığını sanıb, o yolda qaçarkən təngənəfəs qalanlar, yolun sonunda sizi gözləyirəm…