Bakı Şəhər Mədəniyyət Baş İdarəsi Nərimanov rayon Mərkəzləşdirilmiş Kitabxana Sisteminin Mərkəzi Kitabxanasının əməkdaşı Vüsalə Məhərrəmova “Sakura - Yaponiyanın milli çiçəyi” adlı videoçarx hazırlayıb.

Martın 17-də Yaponiyada sakura ağacının ilk çiçəkləri açmağa başlayıb. Bununla da Gündoğar ölkənin qeyri-rəsmi rəmzi olan sakuranın çiçəklənmə fəsli başlayıb.

Qeyd edək ki, Yaponiya sakinləri sakuranı ölkələrinin rəmzi, bu ağacın çiçəklərini isə ölkənin qeyri-rəsmi gerbi hesab edirlər. Uzaq Şərq gilənarının çiçəkləməsinin pik həddi, adətən aprelin əvvəllərinə təsadüf edir, həmin vaxt ölkənin parkları çəhrayı rəngin bütün çalarlarını özündə əks etdirir.

Yapon dilində albalı ağacı “sakura” adlanır. Ölkə üçün çox əhəmiyyətli bir yeri olan sakuralar baharın gəlişini, yenilənməyi və həyatın fani olduğunu təmsil edir. Açdıqdan bir-iki həftə sonra tökülməyə başlayan sakura həyat üçün inanılmaz yaxşı bir metaforadır: həyat qısa, gözəllik müvəqqətidir, ona görə hər şeyin dadını çıxarmaq şərtdir!

Yaponlar sakuranı çox ciddiyə alırlar. “Hanamı” adı verilən sakura izləmə şənlikləri təşkil edirlər. Min illərdir ki, bu ənənə davam etdirilir. Albalı ağacı çiçəklərinin altında ləziz təamlar yeyilib-içilir. Gecə təşkil edilən hanamilərə isə “yozakura” deyilir və gecə sakuraları izləməyin dadı tam fərqli olur.

İlk çiçəklənmədən son çiçəklənməyə qədər albalı ağacı mövsümü bir ay çəkir, hər bir ağac təxminən bir həftəyə qədər çiçəkli qalır. Ağacların ömürü isə ümumiyyətlə 16-20 ildir. Bəzi növlər 250 ilə qədər yaşaya bilər. Ən yaşlı albalı ağacı 2000 yaşındakı Jindai Zakuradır.

Dünyanın müxtəlif ölkələrində yaponların bu ənənələri davam etdirilir. Tayvan, Çin, İngiltərə, Şri-Lanka və s. kimi ölkələrdə xüsusi albalı ağacları əkilir və yazın gəlişi onlarla daha da təntənəli qeyd edilir.

Videoçarxa aşağıdakı keçidlərə daxil olaraq baxa bilərsiniz:

https://www.instagram.com/tv/CckhYeQgXrG/?utm_source=ig_web_copy_link

https://www.facebook.com/100007549111926/videos/453880083205370/