Bakı Şəhər Mədəniyyət Baş İdarəsi Sabunçu rayon Mərkəzləşdirilmiş Kitabxana Sisteminin 2 nömrəli filialı 170 nömrəli tam orta məktəbin şagirdləri ilə birlikdə “Qarabağın incisi - Şuşa” adlı tədbir keçirib.

Kitabxananın fəal oxucusu Münəvvər Rüstəmova “Qarabağın incisi-Şuşa” və onun simvolu olan “Xarıbülbül” haqqında məlumat verərək bildirib: Bir gün bülbül öz sevgilisi gülün görüşünə getmək istədiyi vaxt bərk külək əsir. Nəhəng çinarlar, uca sərvlər, salxım söyüdlər onun qarşısında dönə-dönə əyilirlər. Yalnız zərif, gözəl, ətirli gül küləyə ram olmur. Onun dimdik durduğunu görən külək heyrətə gəlir:

 Ay zərif, ay zəif gül, sən hansı cəsarətlə mənə baş əymirsən? Sən bu gücü haradan alırsan?

 Gül cavab verir:

- Məhəbbətdən! Məhəbbətin gücü yenilməz olur. Sevən vüqarlı olur, heç kəsə baş əymir. Mən bülbülü sevirəm. Mənə güc-qüvvət verən onun saf məhəbbətidir. 

- Baxarıq! Sən məhəbbətini sına, mən də gücümü…

 Külək bunu deyib kükrəyir. Külək qələbəsindən sevinərək daha bərkdən uğuldayır. Bülbül özünü gülün harayına çatdırır. O, sinəsini yavaş-yavaş əyilən gülün köksünə söykəyib, əyilən qamətini düzəldir. Bu vaxt gülün tikanı onun sinəsinə sancılır. Bülbül məhv olur, amma gülü əyilməyə qoymur. Gül həmin vaxtdan bülbül görkəmində çiçəklər aşır. Adı olur xarıbülbül. 

 Dünyanın heç bir yerində rast gəlinməyən xarıbülbül təbiətin ən böyük möcüzələrindən biridir. Azərbaycanın Qarabağ bölgəsində yaşayan əhali bu gülə hər zaman xüsusi münasibət bəsləyib. Xarıbülbül Şuşanın və ümumilikdə Qarabağın rəmzinə çevrilib. Xarıbülbülün təsvirinə Azərbaycan xalçalarında rast gəlmək mümkündür. Xarıbülbüldən xalq təbabətində müxtəlif xəstəliklərin müalicəsində də geniş istifadə edilir.

Sonra söz şagirdlərə verilib. Onlarda Şuşa haqqında şeirlər söyləyiblər, mahnı oxuyublar.

Videoçarxı aşağıdakı keçidlər vasitəsilə izləyə bilərsiniz: 

https://m.facebook.com/story.php?story_fbid=531185665267703&id=100051288229979

https://www.instagram.com/tv/Cejmv4ujDG3/?igshid=YmMyMTA2M2Y=