Qustav Klimt 1816-cı ildə Avstriyanın Vyana şəhərində rəssam ailəsində dünyaya göz açıb. Güzəranları o qədər də yaxşı keçməyən ailədə səkkiz uşaq böyüyüb.

Dahi rəssam Qustav şəkil çəkməyi atasından öyrənib, 14 yaşında o, Vyanada rəssamlıq məktəbinə qəbul olunub, bir il sonra qardaşı Ernest də həmin məktəbdə təhsil almağa başlayıb. Təhsilini bitirdikdən sonra Klimt qardaşı ilə birlikdə muzeylərin, teatrların divarlarına freskalar çəkməklə pul qazanıb, həm də bu onun ilk peşakar rəssamlıq təcrübəsi idi. Bir neçə il sonra atasını və qardaşını itirən Qustav böyük ailənin ağırlığını daşımağın məsuliyyətini hiss edib. Elə həmin dövrdə onun sənətə olan baxışları da dəyişib və rəssam, artıq fərdi yaradıcılığa qədəm qoymağın vaxtı çatdığını anlayıb.

Qustav Klimtin yaradıcılığının ilk illəri mənzərə janrı ilə başlayıb. Sənətşünas alimlər qeyd edir ki, hətta mənzərə janrında çəkilmiş bu əsərlərə də diqqətlə baxsaq, orda fiqurlar, titrəyən insan kölgələri görə bilərik.

Klimtin əsərlərini seyr edərkən, tablolardan həzin və başqa dünyadan gələn mələk səsinə bənzər bir musiqi süzülür. Qustav Klimt Avstriya rəssamlığında modernizm janrının ilk nümunələrini yaradan rəssam sayılır. Dövrünün insanları üçün yeni, qəfil meydana çıxan modern üslublu rəsm əsərlərini həzm etmək çətin idi.

1894-cü ildə Klimt Vyana Universitetinin akt zalının tavanı üçün üç irihəcmli rəsm çəkmək təklifi alıb, əsərlər altı ilə hazır olub,lakin heç də xoş qarşılanmayıb. Əsərlər dindarlar, siyasi xadimlər və hətta rəssamlar tərəfindən də qəbul olunmayıb. Klimt bir daha sifarişlə irihəcmli rəsmlər cəkməyəcəyinə söz verib, sonralar o, sifarişlə yalnız portretlər çəkib. Bundan sonra Qustav Klimt yaradıcılığının "Qızıl dövrü" başlayıb. Bu dövr yalnız ən şahanə əsərlərini yaratdığına görə deyil, həm də çəkdiyi bütün əsərlərdə qızılı rəngin dominantlıq etdiyinə görə belə adlanıb. Rəssamın qızıl dövrdə işlədiyi "Afina sarayı", "Yudif", "Adel", "Ümid", "Öpüş" və bir çox başqa əsərlər indi də dünyanın ən məşhur rəngkarlıq nümunələri sırasındadır.

Klimt daha çox qadınları çəkib, qadın vücudunu o vaxta kimi hələ heç bir rəssamın yaratmadığı özünəməxsus bir tərzdə yaradıb. Onun qadınları bəzən şıltaq, bəzən çılğın, bəzən qüssəlidir, amma hamısını birləşdirən bir cəhət var- onlar azadlığı sevir və sərhədlərə yox deyirlər. Klimt üçün qadın yalnız gözəllik və zövq mənbəyi deyil, həm də bəşəriyyəti xilas və bəxtiyar edə biləcək yeganə varlıq idi.

Klimtin bəzi əsərləri fəlsəfi və psixoloji bir təsir gücünə malikdir. "Qadının yaş dövrləri", "Həyat və ölüm", "Təbabət" əsərləri belələrindəndir. "Həyat və Ölüm" əsəri 1911-ci ildə Romada Ümumdünya sərgisində priz qazanıb.

Ömrünün son illərində rəssam ağciyərlərinin soyuqlamasından əziyyət çəkib. 1918-ci ildə o, insult keçirib və çox keçmədən vəfat edib. Klimtin bir çox əsərləri yarımçıq qalıb.