Bakı Şəhər Mədəniyyət Baş İdarəsinin təşkilatçılığı ilə 4 nömrəli Uşaq İncəsənət Məktəbində Azərbaycanın ilk peşəkar qadın rəngkarı, Əməkdar incəsənət xadimi Vəcihə Səmədovanın 100 illik yubileyinə həsr edilmiş sərgi təşkil edilib.

Vəcihə Səmədova Azərbaycan təsviri sənət tarixində öz layiqli dəsti-xətti və yaradıcılıq manerası ilə seçilən sənətkarlarımızdandır. Qısa ömür yaşayan və fitri istedada malik olan Vəcihə Səmədovanın fərdi sərgiləri Bakı, Moskva, Sofiya və digər şəhərlərdə uğurla nümayiş etdirilib. Onun tablolarındakı rəng çalarları, milli kolorit, böyük ustalıq bu əsərlərin müxtəlif muzey və qalereyalarda layiqli yer tutmasına səbəb olub.

IV sinif şagirdi Aylin Mirzəzadə görkəmli rəssamın həyat və yaradıcılığı haqqında hazırladığı təqdimatla sərgi iştirakçılarını , müəllim və şagirdləri tanış etdikdən sonra sərgiyə baxış keçirilib.

Sərgidə kiçik rəssamların Vəcihə Səmədovanın yaradıcılığına həsr edilmiş rəsmləri nümayiş olunub.