Bu gün dünyaşöhrətli müğənni, SSRİ Xalq artisti Zeynəb Xanlarovanın 87 yaşı tamam olur. Zeynəb Yəhya qızı Xanlarova 28 dekabr 1936-cı ildə Bakıda anadan olub.

O, 1956-cı ildə M.Ə.Sabir adına Bakı Pedaqoji məktəbini və 1961-ci ildə A.Zeynallı adına Bakı Musiqi Texnikumunu bitirib.

Xalq artisti 1961-ci ildən Opera və Balet Teatrının solisti kimi fəaliyyətə başlayıb. Ü.Hacıbəylinin “Leyli və Məcnun”, “Əsli və Kərəm” operalarında Leyli və Əsli obrazlarını yaradıb. Xalq artistinin repertuarında muğamlar, təsnif və Azərbaycan xalq mahnıları, bəstəkar mahnıları, Şərq xalqlarının mahnıları geniş yer tutur.

Dünyanın əksər ölkələrində konsertlər verib.

Haqqında “Salam, Zeynəb!” adlı sənədli televiziya filmi çəkilib.

Zeynəb Xanlarova həm də uzun illər Azərbaycan Respublikası Milli Məclisinin deputatı olub. Zeynəb xanım “Şöhrət” ordeni ilə təltif edilib. 1975-ci ildən Azərbaycanın Xalq artisti, 1980-cı ildən SSRİ Xalq artisti, 1985-ci ildən Azərbaycan SSR Dövlət mükafatı laureatıdır.