Əməkdar incəsənət xadimi, tanınmış heykəltəraş, Azərbaycanın Xalq rəssamı, professor, Rusiya Rəssamlıq Akademiyasının fəxri akademiki (2009), Azərbaycan Dövlət Rəssamlıq Akademiyasının prorektoru Fuad Məmmədəmin oğlu Salayev 1943-cü il sentyabrın 24-də Bakı şəhərində anadan olub.

Fuad Salayev təhsilini ilk öncə Ə.Əzimzdə adına rəssamlıq məktəbində sonra isə İ.Surikov adına Dövlət rəssamlıq məktəbində alıb. Almaniya və Yuqoslaviyada keçirilən heykəltəraşlıq üzrə beynəlxalq simpoziumların, həmçinin respublikada və xaricdə keçirilən sərgilərin iştirakçısı olub.

Fuad Salayevin əsərləri ABŞ, Rusiya, Kanada, İngiltərə, Fransa, İtaliya, Almaniya, Avstriya, Türkiyə və Yaponiyada muzey, fond, qalereya və şəxsi kolleksiyalarda saxlanılır. Əsasən bürünc üzərində işləyir, həmçinin digər materiallardan istifadə edir.

Azərbaycan Rəssamlıq Akademiyasının prorektoru, Xalq rəssamı, professor Fuad Salayevə Rusiya Rəssamlıq Akademiyasının fəxri akademiki adı verilib.

Fuad Salayev 2013-cü il sentyabrın 21-də Azərbaycan Respublikasında heykəltəraşlıq sənətinin inkişafındakı xidmətlərinə görə "Şöhrət" ordeni ilə təltif edilib.