Azərbaycanın görkəmli ictimai-siyasi və dövlət xadimi Nəriman Nərimanovun vəfatından, eləcə də yeganə övladı Nəcəfə ünvanladığı “Bitməmiş məktub”u yazmasından bir əsr ötür...

Bu münasibətlə Bakı Şəhər Mədəniyyət Baş İdarəsinin tabeliyində olan N.Nərimanovun xatirə muzeyində “Bitməmiş məktub və nakam ömür” adlı tədbir keçirilib.

Tədbirdə elm adamları, mədəniyyət işçiləri, muzey fəalları, KİV nümayəndələri və başqa qonaqlar iştirak ediblər.

Tədbirdə N.Nərimanovun ömrünün mühüm hissəsinin qəlbən inandığı və həyatının başlıca vəzifəsi sayaraq müqəddəs amala çevirdiyi xalq işi uğrunda ardıcıl mübarizələrdən keçməsindən, milli maraqları daim üstün tutan rəhbər kimi taleyüklü problemlərə münasibətdə xalqımızın mənafeyini imkanlarının ən son həddinədək müdafiə etməsindən danışılıb.

Tədbirdə ilk dəfə olaraq qonaqlara N.Nərimanovun oğlu Nəcəfə və çox güman ki, onun simasında gələcək nəsillərə xitabən yazılmış “Bitməmiş məktub” - əlyazmasının əsli təqdim edilib.

N.Nərimanovun və oğlu Nəcəfin həyatından mühüm anları özündə əks etdirən videoçarx da tədbir iştirakçılarının marağına səbəb olub.

İştirakçıların maraqlı düşüncə və rəyləri ilə davam edən tədbirdə keçmişimizi öyrənmək, tarixi şəxsiyyələrimizin miras qoyub getdikləri zəngin irsdən doğru faydalanmaq fikri üstünlük təşkil edib.

Tədbirin sonunda muzeyin fonduna yeni daxil olan tədqiqat əsərləri, kitab, qəzet, jurnallar və N.Nərimanovun müxtəlif illərdə çəkilmiş portretlərindən ibarət sərgi nümayiş etdirilib.