Dünyanı bürüyən koronavirus pandemiyası və qüvvədə olan ciddi karantin rejimi cəmiyyətdə bir çox məhdudiyyətlər yaradıb. Onlardan biri də açıq havada istirahətlə bağlıdır. Lakin insan sağlamlığının əsas amil olduğunu nəzərə alaraq, oxucularımıza sosial məsafə şərtlərinə əməl etməklə, sanitar-epidemioloji qaydaları gözləməklə postpandemiya dövründə istirahət etmək üçün münasib yerlər haqqında məlumatı təqdim edirik.

Yay mövsümündə insanlar istirahət üçün açıq məkanlara üz tuturlar. İsti günlərdə çimərlik, meşə, dağ və s. bu kimi ərazilər ən yaxşı seçimdir. Ölkəmizinin iqlimi və təbiəti yay boyu səyahətlər üçün əlverişlidir. Əgər siz şəhərdən çox uzaqlaşmadan dincəlmək istəyirsinizsə, bu məqaləni oxumağınızda fayda var.

Mərdəkan Dendrarisi

Əvvəlcə bildirim ki, Dendrari adı yunan dilində işlənən “dendra” sözündən götürülüb, mənası “nadir ağaclar məskəni” deməkdir. Bir əsr yaşı olan park sovet rejimi qurulmazdan öncə, 1890-1920-ci illərdə neft milyonçusu Murtuza Muxtarovun bağ evi olub. M.Muxtarov parkın ərazisini aldığı vaxt bura qayalıqlardan ibarət olub. O, parkın tonlarla torpağını Lənkərandan gətirtdi. Parkın florası olduqca zəngindir. Burada piknik etmək üçün gözəl təbiət, sərin və təmiz hava, şərait və ən əsası icazə var. Dendrariyə Koroğlu metrosundan taksilər və avtobuslar hərəkət edir.

Nəbatat bağı

Şəhər daxilində oksigen axtaranlar yolunu Nəbatət bağından sala bilərlər. Bağda müxtəlif növ, yerli və xarici bitkilər əkilib. İstirahət etmək, dostlarla vaxt keçirmək üçün gözəl mühit yaradılıb. Elmlər Akademiyası metrosundan 53, Gənclikdən isə 3 nömrəli avtobusla gedə bilərsiniz.

Dədə Qorqud Parkı

Uzağa getməyə heç ehtiyac yoxdur, şəhərin mərkəzində 2013-cü ildə salınmış Dədə Qorqud Parkı da piknik etməyiniz üçün münasibdir. Park yeni salındığı üçün ağaclar çox hündür deyil, bu səbəbdən günortadan sonra istirahət etməyi tövsiyə edirik.

Zirə Eko Park

Bakı-Pirallahı yolu üzərində yerləşən Zirə Mədəniyyət Mərkəzi, başqa adla desək, Zirə Eko Parkı həm uşaqların, həm də böyüklərin zövqünü oxşayacaq yaşıllığa sahibdir. Burada piknik üçün ləvazimatları (stol, stul və s.) kirayə götürə bilərsiniz.

Balıqlı Göl

Həftəsonlarını Balıqlı Göldə istirahət etməklə dəyərləndirə bilərsiniz. Bu məkan Binədən Qalaya gedən yolda yerləşir.

Bakı Mərkəzi Parkı

Bakının mərkəzində yerləşən bu parkda da ailəniz və dostlarınızla piknik etmək üçün bir araya gələ bilərsiniz. Yeni istifadəyə verilmiş Mərkəzi Park köhnə Sovetski ərazisində salınıb.