Görkəmli qrafika ustası, Xalq rəssamı Arif Hüseynov daim axtarışda olan, milli folklora, adət-ənənəyə bağlı sənətkarlarımızdandır. Onun illər boyu müxtəlif miqyaslı sərgilərdə nümayiş etdirilən əsərləri rəssamın sənət dünyasındakı imzasını təsdiqləyəcək mühüm faktlardır. Ötən əsrin 70-ci illərindən başlayaraq Arif Hüseynovun əsərləri dəfələrlə Bakıda, eləcə də dünyanın bir çox möhtəşəm sərgi salonlarında tamaşaçıların diqqətinə çatdırılıb. Moskvada, Praqada, Tokioda, Ankarada, İzmirdə sərgilənən əsərlərinə görə Arif Hüseynov müxtəlif mükafatlara, diplomlara layiq görülüb.

Bu gün Arif Hüseynovun əsərləri R.Mustafayev adına Azərbaycan Dövlət İncəsənət Muzeyində, Azərbaycan Dövlət Rəsm Qalereyasında, Moskva Dövlət Şərq Xalqları İncəsənət Muzeyində, həmçinin şəxsi kolleksiyalarda saxlanılır. O, ilk təhsilini Ə.Əzimzadə adına Azərbaycan Dövlət Rəssamlıq Məktəbində alıb. Sonralar Azərbaycan Dövlət Mədəniyyət və İncəsənət Universitetini bitirib. 1975-ci ildən Rəssamlar İttifaqının üzvü olan Arif Hüseynov Xalq rəssamıdır.

Sənətşünas Ziyadxan Əliyev görkəmli rəssamla bağlı yazır: "Qrafika sənətinin bədii və texniki imkanlarına kifayət qədər bələd olan və ağ-qara cizgiləri ilə də onlara yığcam rəng ovqatının qatılmasını bədii-psixoloji təsir gücünün artırılmasına yönəltməklə daha təsirli ifadə vasitələrinə can atan rəssam sonda cəlbediciliyi ilə yanaşı, həm də dərin fəlsəfi yüklü əsərlər yaratmağa nail olmuşdur".

Həqiqətən də yaradıcılığı boyu bütün varlığı ilə bağlandığı maddi mədəniyyət nümunələri, folklor, adət-ənənəmiz onun əsərlərində yeni həyata, yaşama qədəm qoyub. Məsələn, "Qarabağ şikəstəsi", "Mis qablar", "Aşıq", "Kəndirbazlar" və s. əsərlərdə rəssamın qədim miniatür sənəti ənənələrinə bağlılığı ilə yanaşı, vətəndaşlıq yanğısı və təəssübkeşliyi də qabarıq hiss edilir.

2008-ci ildə Almaniyada keçirilmiş "Azərbaycan ili" çərçivəsində Xalq rəssamı Arif Hüseynovun və onun oğlu Orxanın Berlində sçılmış fərdi sərgisi iki dost ölkənin mədəni əlaqələrinin genişlənməsinə verilən töhfə kimi qiymətləndirilib. Azərbaycan Respublikasının Birinci vitse-prezidenti, Heydər Əliyev Fondunun prezidenti, UNESCO və İSESCO-nun xoşməramlı səfiri Mehriban xanım Əliyeva sərginin açılış nitqində: "Sərginin ekspozisiyasının ata-oğulun, ölkəmizin tanınmış fırça ustası, Xalq rəssamı Arif Hüseynovun və istedadlı gənc rəssam Orxan Hüseynovun əsərlərindən təşkil olunması da səbəbsiz deyil. Bu, ilk növbədə, milli incəsənətimizdə mövcud olan ənənə və müasirlik probleminin əməli həllinin parlaq nümunəsidir"- deyib.

Azərbaycan mədəniyyətinin, təsviri sənətinin dünya ictimaiyyətinə tanıdılmasında növbəti uğur olan “Şərqdən Qərbə” sərgisi Almaniya ilə Azərbaycan arasında yaranan mədəni əlaqələrin inkişafında yeni səhifəyə çevrilib. Dünyaya böyük sənətkarlar bəxş etmiş Almaniya kimi bir ölkədə Azərbaycan rəssamlarının əsərlərinə göstərilən rəğbət də bunu təsdiqləyib.

Ədəbiyyatı ürəkdən sevən Arif Hüseynov böyük söz ustalarının yaradıcılığına dəfələrlə müraciət edib. Onun N.Gəncəvi, M.Füzuli, M.Ə. Sabir, H.Cavid, S.Vurğun, R.Rza və digər klassiklərimizlə bağlı yaratdığı əsərlər dəzgah qrafikasının ən gözəl nümunəsi sayılıb. Rəssam bir sıra bədii ədəbiyyat nümunələrinə də tərtibat verib. 2009-cu ildə Mədəniyyət Nazirliyi tərəfindən "Arif Hüseynov-Orxan Hüseynov" adlı kataloq buraxılıb. Burada azərbaycanlı rəssamların Berlin qalereyasında qazandığı uğurlardan söz açılır, orada sərgilənən əsərlərin fotoşəkilləri təqdim olunur. Kətan üzərində yağlı boya ilə işlənmiş bu rəsmlərə baxdıqca azərbaycanlı rəssamların həm sənət dünyasına bələd olur, həm də mövzularının al-əlvanlığına, təsirliyinə heyran qalırsan. Həqiqətən də milli-mənəvi dəyərlərimizin rənglərlə ifadəsi çox maraqlı alınıb. Müəlliflərin müraciət etdikləri bütün mövzularda mənəvi dəyərlərə bağlılıq qabarıq şəkildə əks olunur.

Həm Arif, həm də Orxan Hüseynovlar eyni bir mövzu üzərində çalışıblar, ayrı-ayrılıqda Üzeyir Hacıbəylinin portretini yaradıblar. Bu portretlərdə Üzeyir Hacıbəyli yaradıcılığı rənglərin dili ilə bəyan edilir. Müəlliflər həqiqətən də Üzeyir Hacıbəyli haqqında bir bədii ensiklopediya yaradıblar. Bu ensiklopediyanın bütün sözləri rənglərdən ibarətdir.

Arif Hüseynov pedaqoq kimi daim gənclərin yanındadır, onlara sənətin sirrlərini öyrətməklə yanaşı, estetik zövqlərinin formalaşması, klassika ilə müasirliyin ahənginin yaradılmasında incəsənət qanunlarının qorunub saxlanılması istiqamətində dəyərli tövsiyələrini verir. Arif müəllimin “Mədəniyyət” telekanalında yayımlanan “Dərsdən sonra” verilişində isə məktəblilər Azərbaycan incəsənətinin müxtəlif növlərini rəssamların emalatxanalarında, muzeylərdə, qalereyalarda öyrənir, sənətkarlarımızla, incəsənət xadimlərimizlə söhbətlərində keçirdikləri hissləri paylaşır və özlərini müxtəlif sahələrdə sınayırlar.

Azərbaycanın Xalq rəssamı, gözəl fırça ustası Arif Hüseynovu ad günü münasibətilə təbrik edir, ona cansağlığı və yeni-yeni yaradıcılıq uğurları arzulayırıq.