Respublika Gənclər Kitabxanasında iki dəfə Sovet İttifaqı Qəhrəmanı, general Həzi Aslanovun 115 illiyi münasibətilə “Əfsanəvi sərkərdə, unudulmaz qəhrəman” adlı vəsait və virtual kitab sərgisi hazırlanıb.

Kitabxanadan AZƏRTAC-a bildirilib ki, materiallarda Həzi Aslanovun 110 illiyinin qeyd edilməsi haqqında Azərbaycan Respublikası Prezidentinin Sərəncamının tam mətni, general Həzi Aslanovun həyat və hərbi fəaliyyətindən məlumatlar təqdim olunub.

Həmçinin İkinci Dünya müharibəsi zamanı nümayiş etdirdiyi misilsiz qəhrəmanlıqdan bəhs edən “İkinci Dünya müharibəsinin “dəmir pələngi” başlıqlı mətn, layiq görüldüyü orden, medal və fəxri adlar, xatirəsinin əbədiləşdirilməsi haqda məlumatlar da yer alıb. Kitabxana əməkdaşlarının hazırladığı vəsaitdə general Həzi Aslanova həsr olunmuş əsərlərin, həyatının motivləri əsasında çəkilmiş filmlərin siyahısı, bir sıra görkəmli şəxslərin onun haqqında söylədikləri dəyərli fikirlər də var.

“Əfsanəvi sərkərdə, unudulmaz qəhrəman” adlı vəsaitdə Sovet İttifaqı Qəhrəmanı Həzi Aslanov haqda dərc edilən məqalələrin, virtual kitab sərgisində isə “Həyatı ilə əbədi şöhrət qazanan böyük sərkərdə”, “Azərbaycan SSR 1941-1945-ci illər müharibəsində”, “Sərkərdənin taleyi”, “Vətənin şöhrətini ucaldanlar”, “Qəhrəman Həzi” kimi kitabların biblioqrafik təsviri və qısa annotasiyası sərgilənib.

Materiallar kitabxananın rəsmi saytında https://ryl.az/multimedia/sovet-ittifaqi-qehremani-hezi-aslanov-115 https://ryl.az/funds/daycest yerləşdirilib.