Biz xalçalar üzərində ayaq açmışıq. Onların əsrarəngiz naxışları körpə duyğularımıza bələdçilik edib. Bu möcüzəli sənət əsərləri üzərindəki nağıl qəhrəmanları, kainatın sirli obrazları bizə çox şeylər danışıb. Bu xalçalar əsrlər adlayıb, bizə tariximiz, milli-mənəvi dəyərlərimiz haqqında əsl həqiqətləri çatdırıblar. Azərbaycan xalçası xalqımızın ruhunu yaşadan, onun mənəvi dünyasında özünə layiqli yer tutan çox qiymətli sənət nümunələridir.

Bu gün də bu sənət Azərbaycanın istedadlı xalça rəssamları tərəfindən uğurla davam etdirilir. Onların səyi və istedadı xalça sənətimizin yeniləşməsinə, müasirləşməsinə önəmli töhfələr verir.

Xalçaçı rəssam Eldar Mikayılzadə də uzun illərdir ki, öz orijinal çeşnili əsərləri ilə Azərbaycanda xalça sənətinin inkişafına xidmət edir. Ömrünün yarıdan çoxunu  milli xalça  sənətimizin inkişafına həsr edən bu  böyük sənətkar yaratdığı bənzərsiz əsərləri ilə Azərbaycan xalçaçılıq sənəti salnaməsində yeni səhifə açıb. Onun müəllifi olduğu xalçalar dünya miqyasında maraqla qarşılanır, sevilir və yüksək qiymətləndirilir.

Eldar Hidayət oğlu Mikayılzadə 1956-cı il yanvar ayının 18-də Bakının Əmircan kəndində anadan olub. Kənddəki 97 və 226 nömrəli məktəblərdə natamam orta təhsil alıb. 1971 - 1975-ci illərdə Əzim Əzimzadə adına Bakı Rəssamlıq Məktəbinin Rəngkarlıq fakültəsini, 1978 - 1983-cü illərdə isə Azərbaycan Dövlət İncəsənət İnstitutunun (indiki ADMİU) Dekorativ Tətbiqi Sənət fakültəsini Xalçaçılıq ixtisası üzrə bitirib. Təhsilini o vaxtkı Leninqrad Rəssamlıq, Heykəltəraşlıq və Memarlıq İnstitutunda davam etdirib.

1984-cü ildən xalçaçı-rəssam kimi peşəkar fəaliyyətə başlayıb. 1983 - 1986-cı illərdə Azərbaycan SSR EA-nın (indiki AMEA) Memarlıq və İncəsənət institutun xalçaçılıq şöbəsində kiçik elmi işçi, 1986 – 1990-cı illərdə “Azərxalça” Elmi Yaradıcılıq İstehsalat Birliyində baş rəssam kimi çalışıb. Əmək fəaliyyətini həmin birlikdə baş direktorun müavini, baş direktor vəzifələrinin icraçısı olaraq davam etdirib. Sonralar özünün “Xalı” şirkətini yaradıb. 1993 - 2018-ci illərdə Qafqaz Müsəlmanları İdarəsinin Mədəniyyət işləri üzrə sədr müavini olub. 2005-ci ildən Azərbaycan Dövlət Rəssamlıq Akademiyasında pedaqoji fəaliyyətə başlayıb. Hazırda “Dekorativ-tətbiqi sənət” fakültəsi “Bədii toxuculuq və xalça sənəti” kafedrasının baş müəllimidir. Eldar Mikayilzadə 1977-ci ildə yaratdığı ilk sənət əsərini doğma kəndinə həsr edib və onu “Yeni Xilə” adlandırıb. Bundan başqa o, “Bütöv Azərbaycan” (1981), “Şəbi-hicran” (1981, 2006), “Azərbaycan nağılları”, “114. Bismillah”, “Əfşan” (1983, 1995, 1996), “Nağıllar aləmi” (1983), “Rəsul Həmzətov” (1983), “Azərbaycanın musiqi korifeyləri” (1985), “Azərbaycanın poeziya korifeyləri” (1985), “Lətif Kərimov” (1986), “Şam (Füzuli)” (1989), “Xətai” (1990), “Bürclər” (1991, 2000), “Suliddin” (1991), “Xəmsə” (1990), “Sirlər xəzinəsi” (1992), “İslam” (1992), “Təbriznamə” (1993), “Namazlıq” (1993), “Hillari Klinton” (1994), “İthaf” (1995-1997), “Xilaskar” (1995-1997), “Moskvanın və bütün Rusiyanın patriarxı Aleksiyin portreti” (1997), “Üç din” (1998), “Peyğəmbərlərin şəcərəsi” (1998), “Tövrat” (1999), “Bütün Qafqazın şeyxülislamı Hacı Allahşükür Paşazadənin portreti” (1999), “İsanın zühuru” (2000), “Akademik Midhət Abbasovun portreti” (2000), “Bismillahir-rəhmanir-rəhim” (2003), “Üç peyğəmbər” (2004), “Azərbaycan Respublikasının Prezidenti Heydər Əliyev” (2003, 2008), “Pirəbədil” (2009), “Yaranış” (2010), “Kəhkəşan” (2012) və s. xalçaların müəllifidir. O, müəllimi Səttar Bəhlulzadəyə 4 xalça həsr edib: “Səttar dünyası” (1979), “Səttar Bəhlulzadə və dostları” (1982), “Səttar” (1999) və “Səttarın arzusu” (2012). Sonuncu xalçanın kompozisiyasında dahi rəssamın 36 rəngkarlıq əsərindən istifadə olunub.

Eldar Mikayilzadə 1978-ci ildə “Bakı” adlı xalça ilə ilk dəfə respublika sərgisində iştirak edib. 1983-cü ildə Beynəlxalq Xalça Simpoziumunda ilk dəfə Beynəlxalq sərgidə iştirak edib. Londonda (1991), Moskvada (1992), Parisdə (1993), İstanbulda (1995), Brüsseldə (1996) fərdi sərgiləri təşkil olunub. 2010-cu ilin mayında Azərbaycan Xalçası və Xalq Tətbiqi Sənəti Dövlət Muzeyində “Dahilərə ithaf” adlı sərgisi keçirilib. Əsərləri Rusiya, Böyük Britaniya, Fransa, Türkiyə, Səudiyyə Ərəbistanı, Küveytdə şəxsi kolleksiyalarda və muzeylərdə saxlanılır.

Eldar Mikayılzadə xalça motivlərindən istifadə edərək 1992-ci ildə tədavülə buraxılmış milli valyutanın eskizlərinin müəllifidir. O, AXC dövründə yaradılmış gerb layihəsində müəyyən dəyişikliklər edib, alovun yerinə alov dilləri ilə “Allah” kəlməsini yazıb. Eldar Mikayilzadə 1984-cü ildən Azərbaycan Rəssamlar İttifaqının, 1986-cı ildən keçmiş SSRİ Rəssamlar İttifaqının, 2004-cü ildən Rusiya Rəssamlar İttifaqının və UNESCO yanında Rəssamlar Birliyinin üzvüdür, “Azərbaycan xalçaçıları” İctimai Birliyi İdarə Heyətinin üzvüdür.

Müəllifi olduğu “Yaranış” xalçası Frankfurtda, “Kəhkəşan” xalçası isə Amerikada keçirilmiş beynəlxalq sərgilərdə qızıl medala layiq görülüb. Azərbaycan mədəniyyətinin inkişafında xidmətlərinə görə Azərbaycan Respublikası Prezidentinin 27 may 2018-ci il tarixli Sərəncamı ilə “Xalq rəssamı” fəxri adına layiq görülüb.