Azərbaycan Yazıçılar Birliyinin üzvü, "Qızıl qələm" mükafatı laureatı Elxan Elatlı 1962-ci il  dekabrın 19-da Şamaxı rayonunun Sis kəndində anadan olub. Orta təhsilini doğma kəndlərində aldıqdan sonra, Bakıdakı Fizika–riyaziyyat təmayüllü 1 saylı məktəbdə davam elətdirib. Uşaq yaşlarından ədəbiyyata böyük marağı olub. Kiçik şeirlər və hekayələr yazıb. "Kirpi" jurnalında miniatürləri, rayon qəzetində çoxsaylı məqalələri çap olunub.

1980–1985–ci illərdə BDU–nun mexanika–riyaziyyat fakültəsində oxuyub. 1985–2001–ci illərdə doğulduğu kənddə fizika–riyaziyyat müəllimi, Rayon icra hakimiyyətinin ərazi üzrə nümayəndəsi, məktəb direktoru vəzifələrində çalışıb. 2001-ci ildən Bakı şəhərində yaşayıb. İndiyədək 28 kitabı işıq üzü görüb ki, onların dördü şeir, ikisi riyazi məntiq, biri qəhrəmanlıq romanı ("Qisas gecəsi"), digəri psixoloji roman ("Mərtəbələr") və "Xəstə ruhlar" əsəri tarixi-detektiv roman, on doqquzu isə detektiv janrında nəsr əsərləridir. "Xəyanət" romanından sonra detektiv yazıçı kimi tanınmağa başlayıb. İrihəcmli "Qan ləkəsi" romanı və oradakı hadisələrin müəyyən mənada davamı olan "Cəhənnəmdən gələn səs" romanı vətənpərvərlik tərbiyəsi baxımından qiymətli əsərlər hesab oluna bilər. Azərbaycan Yazıçılar Birliyinin üzvüdür.

Yazıçının "Qara xəfiyyə" ləqəbli Qənbər Qasımlı, "Leopard" ləqəbli Ələmdar Məlikov, "Vaşaq" ləqəbli Gültən Dəmirli, Axilles ləqəbli Ayxan Asayev (“Ələkeçməz Yaquar” əsəri) adlı obrazları oxucuların sevimli qəhrəmanlarına çevriliblər.

Azərbaycanın Milli Qəhrəmanı Mübariz İbrahimov haqqında yazdığı "Qisas gecəsi" əsəri isə real faktlara əsaslanmaqla, igid Vətən övladının portretini əks etdirir.