Azərbaycan Silahlı Qüvvələrinin zabiti, mayor Aqşin İsmayıl oğlu Abdullayev 1 oktyabr 1982-ci ildə Şəki rayonunun Kiş kəndində anadan olub. 1988-ci ildə Şəki rayonu, 4 saylı Kiş kənd orta məktəbində 1-ci sinfə daxil olub. Məktəb illərindən onun arzusu hərbçi olmaq idi. 1999-cu ildə orta məktəbi əla qiymətlərlə bitirən Aqşin həmin il Bakı Ali Hərbi Məktəbinə qəbul olub. 2003-cü ildə Ali Məktəbi qurtarıb və növbəti bir ildə TTM-də (Tədris Təlim Mərkəzi) təhsil alıb.

Aqşin Abdullayev 2003-cü ildə leytenant, 2005-ci ildə baş leytenant, 2009-cu ildə kapitan və 2013-cü ildə mayor hərbi rütbələrini alıb. 2004-2017 ci illər ərzində respublikanın müxtəlif yerlərində yerləşən hərbi hissələrdə əhəmiyyətli vəzifələrdə xidmət göstərib. Son vəzifəsi xidmət göstərdiyi hərbi hissənin kəşfiyyat rəisi olub.

Qüsursuz xidmət göstərən mayor Abdullayev "Qüsursuz Xidmətə Görə" 3-cü dərəcəli (10 illik qüsursuz xidmət) və "Qüsursuz Xidmətə Görə" 2-ci dərəcəli (15 illik qüsursuz xidmət) medalları ilə təltif olunub. O, həmçinin "Azərbaycan Respublikası Silahlı Qüvvələrinin 90 illiyi (1918-2008)" və "Azərbaycan Respublikası Silahlı Qüvvələrinin 95 illiyi (1918-2013)" Yubiley medallarına layiq görülüb. 2016-ci ilin aprel döyüşləri zamanı - şəxsi heyətin qarşısına qoyulmuş döyüş tapşırıqlarının yerinə yetirilməsində fərqləndiyinə görə Fəxri Fərmanla təltif olunub. "Şücaətə görə" medalına layiq görülmüş ilk hərbçidir.

Mayor Aqşin Abdullayev 2017-ci il 25 fevralda, Fevral döyüşləri zamanı şəhid olub. Nəşinin neytral zonadan götürülməsi üçün erməni təcavüzkarlarının ağır şərtlər irəli sürməsinə baxmayaraq fevralın 27-də onun və özündən başqa şəhid olan daha dörd nəfərin nəşi neytral ərazindən götürülüb. Fevralın 28-i isə igid zabit doğulduğu Şəki rayonunun Kiş kəndində son mənzilə yola salınıb.

Dəfn mərasiminə on mindən yuxarı rayon sakini ilə yanaşı, şəhidin qulluq etdiyi hərbi hissənin əsgərləri və zabitləri, Azərbaycan Respublikası Müdafiə Nazirliyinin nümayəndələri, respublikanın müxtəlif bölgələrindən gəlmiş vətəndaşlarımız və şəhidin tabeliyində xidmət göstərmiş əsgərləri qatılıb. Müdafiə Nazirliyinin Hərbi Orkestrinin müşaiyəti ilə keçən dəfn mərasiminin sonunda yaylım atəşi açılıb və mayor Abdullayev uğrunda şəhid olduğu torpağa tapşırılıb.

Aqşin 2004-cü ildə ailə həyatı qurub. Onun Amin, Nərmin və Ömər adlı üç övladı var.