Praqa Azərbaycan Mədəniyyət Evində “İki gözəllik harmoniyası: Azərbaycan xalçası və Çex kristalı” adlı sərginin açılışı olub. Sərgi Diasporla İş üzrə Dövlət Komitəsinin dəstəyi, “Azərxalça” ASC və Praqada fəaliyyət göstərən “Halama” Çex Kristal Şirkətinin təşkilatçılığı ilə reallaşıb.

“Azərxalça” ASC-dən AZƏRTAC-a bildirilib ki, sərgidə Azərbaycanın məşhur, zəngin mədəni, milli-mənəvi sərvətimiz olan xalça nümunələri və “Halama”nın Çexiya əl şüşə sənətinə məxsus maraqlı əsərləri, həmçinin Azərbaycan xalçaçılıq sənəti, Çex büllurları və diaspor fəaliyyəti mövzusunda videoçarxlar nümayiş etdirilib.

Tədbirdə Çex Respublikası Hökumətinin və Parlamentinin üzvləri, Çexiyadakı diplomatik nümayəndəliklərin rəhbərləri, Çexiyadakı Azərbaycan icmasının üzvləri, yerli ictimaiyyətin və yerli mətbuatın nümayəndələri iştirak ediblər.

“Natəvan” Cəmiyyətinin sədri, Şərqi Avropa Azərbaycanlıları Koordinasiya Şurasının Çexiya üzrə koordinatoru, Praqa Azərbaycan Mədəniyyət Evinin rəhbəri, sərginin ideya müəllifi Leyla Begim Cəfərova sərgi barədə ətraflı məlumat verib. “Xalça xalqımız üçün böyük tarixi keçmişə malik, əsrlərdir dəyişilməyən və inkişaf edən çox qiymətli mənəvi irsdir. Dünyada şöhrət qazanan Çex büllur sənəti nümunələri ilə qədim xalçalarımızın bir arada nümayişi mədəni harmoniyanın ən gözəl əksidir.

“Azərxalça” Açıq Səhmdar Cəmiyyətinin İdarə Heyətinin sədri, Əməkdar incəsənət xadimi Emin Məmmədov qədim tarixə malik milli xalçaçılıq sənəti və Azərbaycandakı xalçaçılıq məktəbləri barədə məlumat verib. Xüsusilə Qarabağ, Qazax, Naxçıvan, Şirvan məktəblərinin yaranmasından və qiymətli nümunələrindən söz açıb. “Praqa Azərbaycan Mədəniyyət Evində təşkil olunan sərgi xalçaçılıq sənətimizin Avropada tanıdılması üçün böyük fürsətlər yaradır”,- deyə o əlavə edib.

Diasporla İş üzrə Dövlət Komitəsinin sədri Fuad Muradov mədəniyyətin insanlar və xalqlar arasındakı əlaqələri möhkəmləndirdiyinə diqqət çəkib, xaricdəki Azərbaycan evlərinin bu sahəyə verdiyi töhfələrdən danışıb: “Sənət sərhəd tanımır və sənətlə, zəngin tariximizlə bağlı bu mühüm tədbir ənənələri müasir istiqamətlərdə yaşatmağın, xalqlarımız arasında mədəni mübadilənin dərinləşməsinin bariz nümunəsidir. Prezidentin tapşırıqları əsasında xaricdə fəaliyyət göstərən Azərbaycan evlərinin hər birində ana dilinin tədrisi ilə yanaşı, tarix və mədəniyyətimizin də geniş təbliği həyata keçirilir. Azərbaycan evləri təkcə soydaşlarımız üçün deyil, həm də yerli əhali üçün mədəni mərkəz rolunu oynayır, xalqlar və dövlətlər arasında birliyin daha da möhkəmlənməsinə şərait yaradır. Bu mənada bugünkü sərginin Azərbaycan Evində keçirilməsinin əhəmiyyəti böyükdür”.

Azərbaycanın Çexiyadakı səfiri Yaşar Əliyev çıxışında sərgini iki xalqın qiymətli sənət nümunələrinin harmoniyasının yaradılması baxımından yüksək qiymətləndirib.

“Halama” Çex Kristal Şirkətinin rəhbəri Robert Halama rəhbəri olduğu şirkətin fəaliyyəti barədə danışıb, Azərbaycan və Çexiyanın qədim mədəniyyətlərinə diqqət çəkib, sərginin mədəniyyətlərarası inkişafa əvəzsiz töhfələr verəcəyini vurğulayıb.

Sərginin kolleksiyasına müxtəlif ölçülü, fərqli xalçaçılıq məktəblərinə aid həm müasir, həm də klassik üslubda toxunmuş 11 yun xalça daxildir.

Sərgi mədəni hissə ilə davam edib. 2020-ci ildə Çexiyada “İlin adamı” seçilən istedadlı musiqiçi Canel Nəcəflinin, fleyta ifaçısı Hana Jıtnıkovanın ifasında səslənən Azərbaycan və Çex musiqiləri zövqləri oxşayıb.