Niderland Krallığında fəaliyyət göstərən Niderland-Azərbaycan “Odlar Yurdu” Cəmiyyəti milli musiqi və mədəniyyətimizin tanıdılması sahəsində fəaliyyətini davam edir.

AZƏRTAC xəbər verir ki, Niderland-Azərbaycan Odlar Yurdu Cəmiyyətinin sədri Frəngiz Bağırovanın təşkilatçılığı ilə Niderland Krallığı, Amersfort şəhərindəki uşaq musiqi məktəbində Azərbaycan və xarici bəstəkarların əsərlərindən ibarət konsert keçirilib.

Konsert musiqi məktəbləri birliyinin müraciəti əsasında təşkil olunub. Konsertdə Azərbaycanın F.Əmirov, Q.Qarayev, T.Bakixanov, S.Rüstəmov və M.Mirzəyev kimi tanınmış bəstəkarlarının əsərləri ifa edilib. Azərbaycan musiqisinin əsrarəngizliyi dinləyiciləri məftun edib.

Uzun illər Azərbaycan musiqisini Niderland Krallığında təbliğ edərək tanıtdıran Frəngiz Bağırova bəstəkarlarımız və onların əsərləri haqqında məlumat verib. O, həmçinin, bir çox illər ərzində Niderlandın müxtəlif şəhərlərində təşkil etdiyi konsert və tədbirlərdən danışıb.

Konsert Azərbaycan Respublikasının Diasporla İş üzrə Dövlət Komitəsinin dəstəyi ilə baş tutub.