Bakı Şəhər Mədəniyyət Baş İdarəsi Qaradağ rayon Mərkəzləşdirilmiş Kitabxana Sisteminin 5 nömrəli filialı öz oxucularına dünya ədəbiyyatı tarixində detektiv janrının ən görkəmli nümayəndəsi olan Aqata Kristinin doğum gününə həsr etdiyi virtual kitab sərgisini təqdim edib.

Dünya ədəbiyyatında detektiv janrının əvəzsiz ustası kimi tanınan Aqata Kristi (Agatha Christie) 1891-ci il senytabrın 15-də doğulub. Aqata Kristi detektiv janrının klassikidir.

"Staylzda müəmmalı hadisə" əsəri yazıçının ilk detektiv romanıdır. Əsər beş dəfə Britaniya nəşriyyatları tərəfindən qaytarıldıqdan sonra, nəhayət, 1920-ci ildə çap olunub. Hamının sevdiyi personaj Erkül Puaro Aqata Kristinin ilk romanından tanınıb və yazıçının 33 roman və 51 hekayəsində onun fəaliyyəti əks olunub. Bu qəhrəman onun son romanlarının birində vəfat edir. Maraqlıdır ki, bu roman nəşr olunandan 40 il əvvəl yazılıb. Amma naşirlər sevimli personajın ölümü ilə bağlı olan kitabı çap eləməkdən boyun qaçırıblar. Əsərdəki hadisələr o qədər maraqlı süjet xətti üzrə və cəlbedici gərginliklə davam edir ki, oxucu bir anda sonadək oxuyub hadisələrin nə ilə nəticələndiyini bilməyə can atır.

O, 1958-ci ildən ömrünün son gününəcən İngiltərə Detektivlər Klubunun prezidenti olub. Kraliça Yelizaveta ona zadəgan titulu verib.

70-dən çox roman, 20-dən çox pyes və hekayənin yazarı olan, əsərləri əksər dillərə tərcümə edilən ingilis yazıçısı detektiv kino yaradıcılarının da ən çox müraciət etdiyi müəlliflərdəndir (1891-1982).

Aqata Kristi əsərlərinin klassik qəhrəmanı Puaro “Şərq ekspresi”ndə səfərə çıxır və həmişəki kimi baş gicəlləndirən hadisəylə üz-üzə qalır.

Səhər tezdən birinci dərəcəli kupedə kişi meyiti aşkarlanır. Elə bu zaman qatar yolda qalaqlanmış nəhəng qar topası səbəbindən dayanmalı olur və hərəkət edə bilmir. Puaro bu qətl hadisəsini araşdırmaq məcburiyyətində qalır. İşin çətin yanı isə odur ki, qatardakı hər bir möhtərəm sərnişinin, texniki heyət üzvünün qatil çıxmaq ehtimalı var. Yalnız Puaro kimi mahir detektiv, öz parlaq istedadı və iti məntiqi sayəsində belə bir dolaşıq qətl hadisəsini açmağa yardım etmək iqtidarındadır.

Dünya detektiv əsərlərinin şedevrlərindən sayılan “Şərq ekspresində qətl” romanı müəllifin o biri əsərləri kimi çox həvəslə oxunur və oxucunun bütün diqqətini özünə çəkə bilir.

"Puaro istintaq aparır" A. Kristinin yazıçılıq karyerasının ilk dövrlərində çap olunub. Topluya 11 hekayə daxildir. Bu hekayələrin hər biri sonralar detektiv janrının klassikası hesab edilib. Bu toplunun bütün hekayələri ekranlaşdırılıb.

"Puaro istintaq aparır" hekayələr toplusunun qəhrəmanı xəfiyyə Puaro bir çox qətl hadisələrinin üstünü böyük məharətlə açır. İşdə yalnız bir şübhəli məqam varsa belə, yorulmaz detektiv onu araşdıraraq həqiqəti üzə çıxarır.

"Qara qəhvə" məşhur detektiv yazarı Aqata Kristinin seçilən əsərlərindən biridir. Yazıçı burada artıq təqaüdə çıxmış detektiv Erkül Puaronun iti zəkasının ortaya çıxardığı cinayət işindən bəhs edir. Əsərdə görkəmli fizikin zəhərlənərək öldürülməsindən danışılır. Onun qətlində şübhəli şəxslər çoxdur – oğlundan gəlininədək. Ancaq Erkül Puaro tələsik nəticələr çıxarmır və cinayətin üstünü isti izlərlə aça bilir. Bu zaman o, bir sıra maraqlı fəndlərə əl atır.

Mövzu ilə bağlı videoçarxı aşağıdakı keçidlərdən izləyə bilərsiniz :

https://www.instagram.com/p/CFI-LvQh8Sn/?igshid=r8buugi4b944

https://m.facebook.com/story.php?story_fbid=135375318268304&id=100053875086603

https://www.instagram.com/p/CFIgShahJpz/?igshid=lxtbpp38qn7j