Xalq artisti, “Şöhrət” ordenli, Prezident təqaüdçüsü Ramiz Məlik 1963-cü ildə Mirzağa Əliyev adına Azərbaycan Dövlət Teatr İnstitutunun dram və kino aktyorluğu fakültəsinə daxil olub. Akademik Milli Dram Teatrının truppasında aktyorluq etməklə yanaşı, Leonard Frankın “Yad adam” (quruluşçu rejissor Oruc Qurbanov), İlyas Əfəndiyevin “Xurşidbanu Natəvan” (quruluşçu rejissor Mərahim Fərzəlibəyov) və s. pyeslərinin tamaşaya hazırlanmasında rejissor və rejissor assistenti kimi çalışıb. Bir sıra filmlərə çəkilib, filmlərin dublyajı və səsləndirilməsində iştirak edib. O, Azərbaycan Dövlət Televiziyasının hazırladığı Ənvər Məmmədxanlının “Şərqin səhəri” (Bəhruz), Əlibala Hacızadənin “İnanmırsansa…”(Adil) , Nəriman Həsənzadənin “Kimin sualı var?” (Ədalət) və s. əsərlərin tamaşalarında oynayıb. Ramiz Məlik Dövlət mükafatına, Azərbaycan Teatr Xadimləri İttifaqının təsis etdiyi “Sənətkar” medalına, 2010-cu ildə isə Cəfər Cabbarlı mükafatına, “Azərbaycan Respublikası Prezidentinin fəxri diplomu”na layiq görülüb.

Xalq artisti Ramiz Məlik 2023-cü ildə vəfat edib.