Çağdaş Azərbaycan Kültür Dərnəyinin təşəbbüsü ilə Azərbaycan Yazıçılar Birliyinin Natəvan klubunda yazıçı-publisist Oktay Ərgünəşin və yazıçı Pərvanə Mehmanqızının Azərbaycan Milli Qəhrəmanı  Şükür Həmidova həsr olunmuş "Vətən Sənə Oğul dedi" kitabının təqdimat mərasimi keçirilib.

Təqdimat mərasimini Azərbaycan Yazıçılar Birliyinin sədr müavini şair Rəşad Məcid açıb.

Tədbirdə Qarabağ uğrunda döyüşlərdə şəhid olan Vətən övladlarımızın əziz xatirəsi bir dəqiqəlik sükutla yad edilib.

Daha sonra söz Qubadlı Yazarlar Birliyinin sədri Namiq Mənaya verilib. O, qeyd edib ki, 44 günlük müharibə qəhrəmanlarımız bir an belə olsun unudulmur. Onlardan biri də Milli Qəhrəmanımız polkovnik Şükür Həmidovdur. Müharibənin yeni-yeni alovlandığı 1990-cı ildə Şükür Həmidov sənədlərini Cəmşid Naxçıvanski adına Hərbi Liseyə, 1993-cü ildə oisə Bakı Ali Birləşmiş Komandalıq Məktəbinə (BABKM) verir və 1995-ci ildə oranı "Motoatıcı" ixtisası üzrə bitirir. 2006-cı ilin avqustundan isə Şükür Həmidov ixtisasının artırılması üçün Azərbaycan Silahlı Qüvvələrinin Hərbi Akademiyasının müdavimi olur. 2008-ci il iyunun 25-də təhsilini uğurla başa vurur... "Qubadlının azad olduğunu görmək üçün canımı verməyə hazıram,” – deyən şəhid Milli Qəhrəmanımız öz arzusuna çatır. Polkovnik Şükür Həmidov 2020-ci il oktyabrın 22-də Qubadlı rayonu istiqamətində döyüş zamanı ön xətdə şəhid olur.

Təqdimat mərasimində Milli Qəhrəmanın atası Nəriman Həmidov, həyat yoldaşı Könül xanım, qardaşı Əsəd Həmidov, hərbçilər, zabitlər, qazilər, həmçinin yazıçılar, akademiklər iştirak ediblər.

Məruzəçilər öz çıxışlarında Milli Qəhrəmanımızın ömür yolundan bəhs ediblər. Sonda tədbir iştirakçıları Milli Qəhrəmanın ailə üzvləri ilə xatirə fotosu çəkilib.

Şəhidimizin ailə üzvləri və "Vətən sənə oğul dedi" kitabının müəlliflərinə və tədbir təşkilatçılarına öz təşəkkürlərini bildiriblər.

Azərbaycanın Milli Qəhrəmanı, polkovnik Şükür Nəriman oğlu Həmidov şəhidlik zirvəsinə ucalaraq adını Azərbaycan Qəhrəmanlıq salnaməsinə qızıl hərflərlə yazdırıb. Şəhidlər Ölməz,Vətən Bölünməz!!!