Bakı Şəhər Mədəniyyət Baş İdarəsi Xəzər rayon Mərkəzləşdirilmiş Kitabxana Sisteminin 7 nömrəli filialı Azərbaycan ədəbiyyatının qüdrətli şairi Bəxtiyar Vahabzadə yaradıcılığına müraciət edib.

Bəxtiyar Mahmud oğlu Vahabzadə 1925-ci il avqust ayının 16-da Şəki şəhərində anadan olub. Yeddi yaşı olmamış məktəbə gedən Vahabzadənin ailəsi 1934-cü ildə Bakıya köçüb, Bəxtiyar Vahabzadə təhsilini paytaxt məktəbində alıb, 1942-ci ildə Azərbaycan Dövlət Universitetinin filologiya fakültəsinə daxil olub. O, 40 il Azərbaycan Dövlət Universitetində elmi, elmi-pedaqoji fəaliyyət göstərib. Azərbaycan Milli Elmlər Akademiyasının həqiqi üzvü Bəxtiyar Vahabzadə, hər şeydən əvvəl, qüdrətli şair idi, nüfuzlu ictimai xadim idi. Bəxtiyar Vahabzadənin ilk mətbu əsəri "Ədəbiyyat qəzeti"ndə 1943-cü ildə çap olunmuş "Ana və portret" şeiridir.

Şairin əsərlərindən ibarət ilk kitab - "Mənim dostlarım" 1948-ci ildə nəşr olunub. Sonrakı illərdə Vahabzadə elmi axtarışları ilə paralel bədii istiqamətdə də fəaliyyətini genişləndirib. Sonrakı illərdə Bəxtiyar Vahabzadənin əsərləri kitab şəklində çapdan buraxılıb. Belə ki, 1950-ci ildə onun "Bahar", 1953-cü ildə "Dostluq nəğməsi", bir il sonra "Əbədi həyat", "Çinar" və "Sadə adamlar" kitabları işıq üzü görüb. "Aylı gecələr" kitabı 1958-ci ildə oxucuların istifadəsinə verilib.

Bəxtiyar Vahabzadə həm də çoxlu sayda poemalar müəllifidir: "Etiraf", "Əbədi heykəl", "Gülüstan", "Dörd yüz on altı", "Şəbi-hicran", "Muğam", "Şəhidlər" və s. Mütəxəssislər bu əsərlərin başlıca məziyyətləri sırasında həyat materialının zənginliyini, bu materialların insan talelərinin təsvirinə yönəldilməsini, lirik ricətlərin fəlsəfi çalarını xüsusilə qeyd edirlər. Xalq şairi "Muğam" poemasında muğam xəzinəmizin - el mənəvi sərvətinin insanın bir şəxsiyyət, ağıl və qəlb sahibi kimi yetişməsində, vətənpərvərlik duyğularının inkişafında, idrak prosesinin sürətləndirilməsində rolunu çox orijinal bir forma və üslubda ifadə edib.

Onun qələmindən çıxmış "Vicdan", "Yağışdan sonra", "İkinci səs", "Yollara iz düşür", "Fəryad", "Hara gedir bu dünya", "Özümüzü kəsən qılınc", "Dar ağacı" kimi pyeslər Azərbaycan teatrının repertuarında özünə layiq yer tutur. Bu əsərlərin qəhrəmanları xeyirxah, nəcib, humanist insanlar, əsl vətəndaşlardır. Mənfi kredolu, bədxah niyyətli adamlara qarşı çarpışan bu obrazlar öz mənəvi-əxlaqi xüsusiyyətləri ilə milli dramaturgiyamızın obrazlar sistemində seçilirlər. 

Kitabxana əməkdaşı, baş kitabxanaçı Rəhimova Sevda şairin “Bir salama dəymədi” şeirini səsləndirib.

Şeiri dinləmək üçün aşağıdakı keçidə daxil ola bilərsiniz: